Fuarê kitaban ê Îzmîrî yê  42. bi tewrbîyayîşê xeylî weşanxaneyan û sazgehanê cimatkî yê sîvîlan dewam keno. Fuarê kitaban zîyaretkerdoxan ra eleqeyêkê girdî vîneno.

Kitabê Kurdkî ameyî qedexekerdene

Weşanxaneyê Sîtavî yo ke Wan ra ameyo ra Qehîr Bateyî ard ziwan, seba ke kitabê ke înan weşanayê zafêrê ci bi Kurdkî yê, eleqeyêko ke înan pawito nêdîyo û ard ziwan ke, di serrî yo ke Tirkîya de krîz esto û vat, “Hem krîzo sîyasî û hem zî krîzo ekonomîk esto. Krîzê sîyasîyî zaf tesîr kerd. Kitabî ameyî qedexekerdene, vera Kurdkî bêtehemulîye esta. Rasta zî vera Kurdan û Kurdkî nê di serranê peyênan de bêtehemulîye esta. Ma tesîrê ney kitaban ser o vînenê.  Beno ke herême de no zaf nêno dîyene, çi heyf ke rojawan de no tesîr zaf eşkera yeno dîyene.”  

Malbîyayîşê berardişî de zêdebîyayîşo cidî virazîya

Weşanxaneyê Îletîşîmî ra Erkan Akpinar zî nêzdîye des serrî yo beşdarê Fuarê Kitaban ê Îzmîrî beno. Akpinarî ard ziwan ke şarê Îzmîrî sey serranê verênan reyna eleqeyêko gird mojnayo fuarî.

Akpinarî bale ante serê kirîzê ekonomîkî û vat, rîyê krîzê ekonomîkî ra goreyê serra parî  weşanayîşê kitanban se ra 16 ginayo waro û rîyê krîzê ekonomîkî ra weşangeran bi mecburî kitaban rê zam kerdo û vat, ”Seba ke zam kerdo hem hetê rotişî ra hem hetê berardişî ra çi heyf ke sey verî kitabî nênê çapkerdene. Seba ke ameyeyê şarî çin o, bi hawayêkê mecburîyî girewtişê kitaban zî kenê kêm. Teyna kitaban de ney, no xeylî sektoran de wina yo.”

Akpinarî ard ziwan ke 12’ê Nîsane roja Îne de kitabê Hemserekê Pêroyî yê HDP’yî yo verên Selahattîn Demîrtaşî yo dîyin fuarê kitaban de do bêro rotene.

Tirkîya de nisbetê wendişî goreyê standardanê dinya zaf cêr o

Adar Jiyan zî sey nuştoxanê bînan seba îmzakerdişê kitabanê xo  beşdarê fuarê kitaban bîyo. Jiyanî ard ziwan ke Tirkîya de nisbetê wendişî goreyê standardanê dinya zaf cêr o û vat, ”Eke wareyêk de hîsgêrîye çin ba,  ma eşkenê heme wareyê cuye de naye bivînê. Goreyê nisbetê wendişî, Tirkîya de des serrî de kesêk rê kitabêk keweno, la welatê sey Japonya de 25 kitabî kewenê.”

Jiyanî  bale ante muhîmîya wendişî û vat, merdimo ke waneno wayîrê nîyadayîşê globalî yo.