Gerîlayanê YRK û HPJ'yî Newroze pîroz kerde

Gerîlayanê YRK û HPJ'î Newroze pîroz kerde. Fermandaranê YRK'yî ra Şîyar Şevgere vat, “Gerîlayî do nêverdê adirî Newroze şoro xow ra.”

Gerîlayanê YRK û HPJ'yî yê Rojakewtana Kurdistanî Newroze pîroz kerde. Merasîmê eskerîyî seba vîrardişê şehîdanê têkoşînê azadîye yê Kurdistanî bi deqayêkê rêzgirewtişî dest pêkerd. Xeylî fermandarê YRK û HPJ’yî zî tewrê pîrozkerdişî bîyî.

Fermandaranê YRK'yî ra Şîyar Şevgere merasîm de qisey kerd û Newroza Rayberê Şarê Kurdî Abdullah Ocalanî, xoverdayoxanê grevê vêşanîye û şarê Kurdî pîroz kerde. Şevgere ard ziwan ke ê do hêrişanê îşxalkaran bin binbifînê û vat, “Ma prosesêko muhîm de yê. No proses prosesê xoverdayîşî yo. Xoverdayîş her cayê dinya ra bi vila. Wisarê 2019’î mîyanê gerîlayan de kelecanêko gird aferna. Gerîlayî seba azadîye û serkewtişî amade yê.  Bi nameyê hêzanê Rojakewtene, ma do no proses de berpirsîyarî ya ke ma rê kewenê bîyarê ca.  Ma fedaîyê Rayber Apoyî yê. Heme karê ma seba azadîya Rayber Apoyî ya.  No dem de hêrişê giranî vera Rayber Apoyî yenê kerdene. Dewleta îşxalkare wazena hêrişê destkewteyanê ma bikera. Labelê senî ke Kawayê Asinkarî vera zulmê sere wedarit û adirê Newroze xurt kerd, senî ke Mazlûman têkoşîn gird kerd, Leyla Guvene û Zulkuf Gezenan zî ewro têkoşîn resnaye sewîyeya tewr berze. Gerîlayî do nêverdê adirî Newroze şoro xow ra.” Şevgere vengdayîş bi şarê Rojakewtene kerd ke vera tecrîdî bêveng nêmanê û bi ruhê Newroza 2019’î xoverdayîşî gird bikerê.