8 û 9 ‘ê Hezîrane de Bajarê Hannoverî yê Almanya de Mîhrîcana Folklorî ya 32’ine  ameye viraştene.

Amanya, Fransa û Swîsre ra 26 grûbê folklorî tewrê aktîvîteya kulturkî ya Mîhrîcane  bîyî. Aktîvîteya ke bi rayraşîyeyîşêk dest pêkerde û bi rituelê veyva serê astorî eleqedarîye atne xo ser. Roja verêne de  Koma Cangorî  û Koma Mam Zekî yê Domanan û Seyma Serhat û grûba Muzîkî ya Dîlana Roj Arya vejîyayî sehne. Rêzgirewtişê seba şehîdan ra dima bi nameyê TEV-ÇAND’î Bulent Tûran û Xezal Aktaşe qiseykerdişêk kerd. Hemserekanê DKTM’yî  Ayfer Amara û hunermend Ciwan Çewlîgî zî serkewtiş waşt.

Grûban verê jurî de 10 saet performansê xo ramot. grûba Dîlana Roj Arya ya camêrdan ya ke Parîs ra  bi kayê Amedî aktîvîte de ca girewte bîye yewine. Grûba Dîlana Roj Arya ya cinîyan zî bîye a dîyine. Grûba Sîyarî ya bajarê Salzgîrterî yê Almanya bîye zî rêza hîreyine fînaye dest. Xelata kostumî zî mabênê grûba Dîlana Roj Arya ya camêrdan û grûba Govenda Baranî de ameye parekerdene. Xelata cipersayîşî zî dîyaye Govenda Baranî. Xelatê Taybetî yê Jurî zî dîyayî Govenda Rengîn yê Darmstadt û grûba Koma Deranî ya Lînbûrgî.

Kedkare Çapemenîye zî Nêameyî Vîrakerdene

Aktîvîteya Mîhrîcane de kedkarê kultur û çapemenîye zî nêameyî vîrakerdene. Plaketî dîyayî xebatkaranê ANF, Yenî Ozgur Polîtîka, Çira TV, Stêrk TV û Jin TV’yî.  Aktîvîte bi deyîranê Serhadoyî qedîyaye. Çarçeweya Aktîvîteye de Însîyatîfê Halîm Donerî yê Hannoverî, YXK yê Hannoverî û xeylî dezgehanê kulturî  standê kulturê Kurdan akerdî.