Wekîlê HDPyî Zeynel Ozenî waşt ke ganî Komîsyonê Cigêrayîşî yê Meclîsî bêro ronayene ke gef û polîtîkayê cîyakerdişî yê vera elewîyan bêrê cigêrayene, berpirsîyarê nê serebûtan bêrê dîyene, serebûtî bêrê çarekerdene û qesawetê rayaumûmîye û hemwelatîyan bêrê wedaritene.

Ozenî meclîs de nîşankerdişê keyeyanê elewîyan vist vîrî û vat: "Bawerîya elewîyan wina yena hesibnayene ke seke çin a. No destpêkerdiş ra nata wina bi la bitaybetî serranê peyênan de semedê polîtîkayanê cîyakerdişan ê îqtîdarî na rewşe hîna zêde yena dîyene û sucê nefretî yê vera elewîyan benê zêde. Raporê SETA yê ke elewîyan krîmînalîze kenê, xebatê Wezaretê Dîyanetî û eşkerayîyê Erdoganî nê sucanê nefretan kenê zêde û seba hêrişanê vera elewîyan sey sebeban yenê qebulkerdene. Nê mîsalan ra yew zî qiseykerdişê Erdoganî yo ke yew di roje verê cû kerd. Erdogan seba ke elewîyî vera asîmîlasyonî xo ver danê nînan bi vatişê 'bêelîtîye' sucdar keno.

Ez venga ê kesanê ke beranê elewîyan nîşan kenê dana ke beranê elewîyan nîşan mekerê, herinda naye de verê berî de gulan verdê û şorê çayê înan bişimê. O çax şima do fam bikê ke ma dişmenê şima nîyê. Nê esasî ser o ma wazenê şima paştî bidê vernîyazê ma ke meclîs de Komîsyonê  Cigêrayîşî bêro ronayene ke gef û polîtîkayê cîyakerdişî yê vera elewîyan bêrê cigêrayene, berpirsîyarê nê hêrişanê vera elewîyan bêrê dîyene."