KCK’yî serkewtişê QSD'yî pîroz kerd

Hemserekîya Konseya Rayberdişî ya KCK'yî, serkewtişê vera DAÎŞ’î yo ke 23'ê Adare de ame îlankerdene pîroz kerd û bale ante serê muhîmîya têkoşînê rast ê seba çinkerdişê bingeyê îdeolojîk ê DAÎŞ’î.

Hemserekîya Konseya Rayberdişî ya KCK'yî eşkerayîyêka nuştekîye weşanaye û şerwanê ke verê DAÎŞ’î ser kewtê silam û pîroz kerdî.

KCK'yî da zanayene ke, “DAÎŞ hetê sîstemê sîyasî û xeta îdeolojîk a ke cuyeyêka waye û biratîye, demokratîk û azade  afernena ra ameyo binkewtene.”

Eeşkerayîya KCK’yî wina ya:

 “Çeteyê ke kerdibî belayê serê şaranê Rojakewtena Mîyanêne û merdimîye, bi metodanê tewr hovîtîye bi hezaran merdimî kiştî, birîndar kerdî û seqet verdayî. 'Xîlafet' o ke çeteyan awan kerd û serdestîya înan a Sûrîye 23'ê Adare de werte ra ame wedarnayene. Ma şerwan û şarê Kurdî semedê nê serkewtişî bi rêzdarî silam kenê, serkewtişê înan pîroz kenê. Sere de Kurdî, şaranê demokrasî û azadperwerî DAÎŞ bin kerd. Hêzanê Sûrîyeya Demokratîke reyde Kurdanê Sûrîye, Ereban, Asûrî-Suryanîyan, Tirkmenan û enternasyonalîst ê ke nê têkoşînî de şehîd bîyê bi rûmet yad kenê û gazîyan rê zî şîfa xêre wazenê.

Derba verêne Şengal û Mexmûr de, derba girde zî Kobanê de ameye pirodayene

DAÎŞ'î derba destpêkerdiş ya binkewtişî Şengal û Mexmûr de werde. Hêrişê qirkerdişî yê Şengalî û cehdkerdişê seba îşxalkerdişê Başûrê Kurdistanî bi xoverdayîşê gerîlayanê Kurdistanî ame astengkerdene. Derba tewr gird a binkewtişê zî Kobanê de werde. Bi derba Kobanê DAÎŞ’î êdî serheb ver bi waroginayîşî şi. Heme şaranê dinya zî bi roja 1’ê Teşrîna Peyêne Roja Kobanê ya Dinya moralêko gird da nê xoverdayîş. Cayêk de DAÎŞ’î bi paştdayîşî û têhetameyîşê têkoşînê merdimîye ya ke dormeyê xoverdayîşê Kobanê de ameyê pêser kerd vîndî. Hêzanê koalîsyonî zî na merhela ra dima paştdayîşê hewayî da hêzanê xoverdayîşî.

Perspektîfê Konfederalîzma Demokratîke

O yo ke merdimîye têkoşînê vera DAÎŞ’î de resne têhet, sîstemo demokratîk, xoverdayîşo biheybet û îdeolojîyê xoverdayoxanê Kobanê bi. Şorişgerê Rojawanî yê ke Rojawanî de şorişo demokratîk viraşto, no şoriş Ereb, Suryanî, Tirkmen, Armen, Çeçen û Çerkezan reyde heme Vakur û rojakewtena  Sûrîye û Efrînî ra vila kerdo. Bi perspektîfê konfederalîzma demokratîke têkoşîno ke dewlet û îqtîdarî esas nêgêno, îradeyê demokratîk ê şaran û xoserîya demokratîke sey modelêkê çareserîye yê rastî bi rêxistin kenê, persê ke DAÎŞ’î înan îstîsmar keno rê çareserîyêkê rastikênî dîye, karekterê dişmenîya merdimî ya îdeolojîyê DAÎŞ’î eşkera kerd û ruhê DAÎŞ’î girewt. Eke na xeta îdeolojîke, projeyê cuya polîtîke û  cimatkî nêbîyêne, tu hêzanê eskerîye nêeşkenê netîce bigêrê.

Wereyêkê demokrasî yê serê xeta Ocalanî

Serkewtişê şorişê demokratîk ê Rojawanî û cuya bi hawayê azade, waye û biratîya û pîyaciwîyayîşê şaranê cîyayan, Rojakewtena Mîyanên a ke mîyanê şer û kaosî ra ameya resaya wareyê demokrasî, na serê bingeyê xeta siyasî û îdeolojîk ê Rayber Apoyî de virazîye.  Şarê Erebî, Suryanî, Tirkmenî, Çeçenî û Armenî Kurdan reyde bîyî neteweyêka demokratîke û  ser kewtî. Xoverdayîşê şarê Kurdî yê vera DAÎŞ’î û heme hêrişanê serê bingeyê cimatê demokratîk ê rêxistinbîyayîş û azadîperwerîya cinîyan de ame kerdene, coka no şoriş eynî wext de bi şorişê cinîyan. No şoriş bi coşê cuya demokratîke û azade ameye viraştene. Hêzê ke rîyê înan tarî yo ke waştêne cuyêka tarîye biafernê bi nê hawayî ameyî binkewtene.

Têkoşînê cuya demokratîke

Na rastîye musna ke; eke vera çete û rêxistinanê sey DAÎŞ’î yê teberê merdimîye de têkoşînêko rast ê îdeolojîk û bitesîr nêro dayene, têkoşînê cuya azade û demokratîke nêro dayene,  o wext verê rêxistinanê winayan nêno girewtene. Nê bingeyî ser o, ma vengdayîş bi merdimîye û heme şaran kenê ke vera zîhnîyet û rêxistinanê sey DAÎŞ, El Nûsra, AKP-MHP'î de, serê xeta cimatê demokratîk ê rêxistinbîyayî yê azadperwerîya cînîyan û neteweya demokratîke de, têkoşînê azadîye û demokrasîyê girdî biderê û Rojakewtena Mîyanên a Demkoratîke û merdimîya azade biafernê.”