Kincanê tradîsyonalan ê kurdan modaya Moskova xemilna

Moskova de musabeqaya modaya berze ya Ewro-Asya de kincê neteweyî ameyî pêşkêşkerdene. Kincê kurdan sey kincanê tewr rindan ameyî weçînayene.

Paytextê Federasyonê Rûsya Moskova de bi beşdarîya zaf neteweyanê cîyayan Musabeqaya modaya berze ya Ewro-Asya ya kincanê neteweyan ame kerdene.

Musabeqa de ke bînaya Keyeyê Neteweyan de ame kerdene bi paştdayîş û hetkarîya Otonomîya Federale ya Kulturî û Neteweyîya Kurdan a Rûsya kincê kurdan ameyî mojnayene. Neteweyê Rûsya gorê kultur û hunerî yê neteweyî û erf û adetanê xo beşdarê defîleyî bîyî. Musabeqa de kincê des herêmanê Kurdîstanî ameyî mojnayene. Musabeqa de kincê kurdan sey kincanê tewr rindekan û başan ameyî weçînayene. Cilê kurdan grûbêka musabeqa de kewtî rêzê dîyînî. Peynîya bernameyî de komîteya raydayîşî xelata serkewtişî koma cilanê kurdan rê teslîm kerd.