Kişanake grevê vêşanîye de ya: Tecrîd ganî bêro wedartene

Hemşaredara Bajarê Pîlî ya Amedî Gultan Kişanake zî vera tecrîdê serê Ocalanî dest bi grêvê vêşanîye kerd.

Hemsereka KCDyî û parlamentera HDPyî ya Colemêrgî Leyla Guvena ke semedê wedartişê tecrîdê serê Rayberê Şarê Kurdî Abdullah Ocalanî grevê vêşanîye de ya, ci rê paştîdayîşî zêdîyenê. Hemşaredara Bajarê Pîlî ya Amedî Gultan Kişanake ya ke sey rehîne yena tepiştene, da zanaye ne ke aye zî ewro dest bi grevê vêşanîye yê 10 rojan kerd.

ROLÊ BIRÊZ OCALANÎ AMEYO DÎYAYENE

Kişanake bale ante muhîmîya rolê Ocalanî ser û va: ‘‘Ez zî paştî dana çalakîya parlamentera ma Leyla Guvene û semedê wedartişê tecrîdê serê Birêz Ocalanî dest bi grevê vêşanîye kena. Îmrali de heme qeydeyê huqûqî û heqê merdiman yenî binpaykerdene. Xora rolê Birêz Ocalanî yê aşitîya cimatkîye demo ravêrtê de ame dîyayene. Coka şikitişê tecrîdî vernîya aşitîye akeno û beno destpêkê demê neweyî.‘‘

MA DO SER BIKEWÊ

Kişanake veng da rayêperoyî ya demokratîke, waşt ke çalakîya grevê vêşanîye rê wayîr bivejîyo û xoverdayîş gir bikero û wina qedîna:‘‘ Ganî ma destûr medê  şer, merg û zulm vengê aşitîye bibirno. Ez bawer kena ke ma do bi xoverdayîşî ser bikewê.‘‘