Komîteya Perwerdeyî ya KCK’yî bi wesîleya roja 15’ê Gulan a Roşanê Ziwanê Kurdkî eşkerayîyêka nûştekîye vila kerde û Roşanê Ziwanê Kurdkî pîroz kerd.

Eşkerayîye de nê ameyî vatene:

“Prosesêk de ke îradebîyayîşêko biheybet şexsê rojeyê mergî û çalakîyanê grevê vêşanîye de zîndanan ra dest pêkerdo û şên bîyo, her çar perçeyanê Kurdistanî de û heta her hetê dinya de vila bîyo û bi xoverdayîşê mayan ma Roşanê Ziwanê Kurdkî pêşwazî kenê. Sebebêko tewr muhîm ê nê xoverdayîşî û bedelan zî tewiro tarîxî yê pawitiş û ciwînayîşê ziwanî û heme erc û pîrozîyanê ma yo. Na mana de ma sere de yê Rayber Apoyî Roşanê Ziwanê Kurdkî şarê xo, xoverdayoxan û hemreyan xo rê pîroz kenê.

Seke yeno zanayene 15’ê Gulan a 1932 de kovara Hawarî ya ke bi serkêşîya Celadet Bedirxanî ameye weşanayene, nûştişê alfabeya latînî kerd ziwanê Kurdkî mîyan, no sey destpêk û hemleyêk bi, bi wayîrê manayêka tarîxîye. Na yewe ra zî serra 2006 ra nata her roja 15’ê Gulane û hewteyê ci sey Roşanê Ziwanê Kurdkî yena pîrozkerdene.

Şaro Kurd o ke Rojakewtena Mîyanêne de hetê çar dewletan ra ameyo perçekerdene, cayanê cîyayan ê dinya rê vila bîyo; bi kultur, ziwan û dîyalektanê xo yê zengînan ke reseno 40 mîlyonî, hewna zî rastê polîtîkayanê qirkerdiş û înkarî yena. Na yewe cewherê rastîya sîstemê mîyanneteweyîyî yo ke ma qalê ci kenê ramojneno ma.

Xusûsen her wareyê cuye de bikarardiş, qiseykerdiş, nûştiş û pê fikiryayîş û heman wextî de ziwanê Kurdkî sey ziwanê perwerde, resî, edebîyatî, sîyasetî û îqtîsadî averberdiş mesuldarîya tewr cidîye ya vernîya şarê ma û roşinvîranê ma de ya. Hendî zaf eşkera yo ke mana û muhtewaya vatişanê sey ‘ez bi ziwanê maya xo nêeşkena qisey bikerî, binûsî, fam bikerî û bifikirî’ nêmenda. Gama ke mesele beno kultur û ziwan ganî bi tewir, cehd û çalakîyan tewirêko tarîxî bêro ramotene. Na mana de vatişê “Ziwan beden o, kultur beden o, coxrafya beden o, bedenê xo rê wayîr vejîyê” yê Rayber Apoyî tewirê cuye yo ke ganî bêro pratîkkerdene ramojneno.

Ganî ma her wextî ra vêşêr ziwan û kulturê xo rê wayîr vejîyê. Nê bingeyî ser o ma reyna roja manîdare ya Roşanê Ziwanê Kurdkî hemrayanê xo yê ke xoverdayîşê tarîxîyî mîyan de cayê xo gênê û heme şarê xo rê pîroz kenê. Heman wextî de ma veng danê ke ten ana roja serre de nê, hemeyê rojanê serre de hîna zaf bi ziwan û kulturê Kurdî biciwîyê û aver berê.”