KON-MED’î Roşanê Ziwanê Kurdkî pîroz kerd

KON-MED: 15’ê Gulane Roşanê Ziwanê Kurdkî ke bi pêşnîyarê edebîyatkar û zanayanê ziwanî yê Kurdan ame pêşnîyarkerdene, seba averberdişê ziwanê Kurdkî xeylî bifayde bîyo.

Konfederasyonê Cimatê Mezopotamya yê Almanya (KON-MED), bi wesîleya 15’ê Gulane Roşanê Ziwanê Kurdkî eşkerayîyêka nûştekîye daye.

Eşkerayîye de ame vatene dewleta Komara Tirkîya ke goreyê esasanê çinkerdişê neteweya Kurdî awan bîye, seba ziwanê Kurdkî çinê bikero, Kurdistan heşê merdiman ra vejo bi hawayêkê stratejîkî çi destê aye ra ameyo kerdo, bica ardo.

KON-MED’î bale ante serê zext û zordarîya ke kultur û ziwanê Kurdan ser o ameyê kerdene û vat, “15’ê Gulane Roşanê Ziwanê Kurdkî ke bi pêşnîyarê edebîyatkar û zanayanê ziwanî yê Kurdan ame pêşnîyarkerdene, seba averberdişê ziwanê Kurdkî xeylî bifayde bîyo. Nika Rojawan û Başûrê Kurdistanî de mektebê ewilênî, mîyanênî û hîrê unîversîteyê cîyayî bi Kurdkî perwerde danê. Bi desan enstîtuyê Kurdan estê û unîversîteyanê Ewropa de zî qismê ziwan û edebîyatê Kurdan ameyê akerdene. Nê yewî wayîrvejîyayîşê ziwanê Kurdkî de havilêka pîle kerda.

Sere de cinî û ciwanî ganî şarê ma qiseykerdişê bi ziwanê maye seba xo sey wezîfeyêkê neteweyî û serberzîyêk bivîno. Qiseykerdiş, nûştiş û fikrê bi ziwanê maye ganî bi nê hawayî bêrê ercnayene.”

Eşkerayîye de veng dîya her kesî ke her wareyê cuye de bi ziwanê xo yê maye qisey bikerê û kultur û ziwanê xo rê wayîr vejîyê.