Şaredarîya Mazgêrdî seba vîrardişê Kazim Unluyî yo ke bi Qerarnameyê Hukmê Qanûnî kar ra ame îxraçkerdene û 23ê Teşrîna peyên a 2017î de netîceyê krîzê qelbî de vefat kerdbi, qeza de kitabxaneyêk akeno.
Qezaya Mazgêrdî ya Dêrsimî de do roja 24ê Teşrîna peyêne ya ke sey Roja Maliman yena zanayene de seba vîrardişê Kazim Unluyî kitapxaneyêk bêro akerdene.
Sekreterê Egîtîm Senî yê Şûbeyê Tekîrdagî Kazim Unlu bi Qerarnameyê Hukmê Qanûnî kar ra amebi îxraçkerdene û netîceyê krîzê qelbî de 23ê Teşrîna peyên a 2017î de wefat kerdbi. Şaredarîya Mazgêrdî seba vîrardişê Unluyî qeza de kitabxaneyêk akeno.
Xebatkaranê şaredarîye ra Pelîn Gungorene va ‘xebatê akerdişê kitabxaneyî 2 mengî dewam kerd’ û wina domna: “Ma xeylê bajaran ra kitabî ardî. Ma waşt ke nameyê Unluyî bi kitabxaneyêk reyde bidê ciwîyayene. Kazım Unlu vengê kedkaran bi. Ma bawer kenî ke şarê ma hîna zaf biwano û hîna zaf bibo zanaye.”
Gungorene da zanayene ke şarê Dêrsimî cigêrayîş û ilmî ra zaf hes keno û wina dewam kerd: “Cok ra Dêrsim hetê wendişê kitaban de Tirkîya de rêza 1. de yo. Ma felsefeya ‘her kitabêk merdimêk o’ esas gênî. Her kitabêk yeno manaya bi hezaran merdim û fikrê cîyayî. Mazgêr de merdimî tay ê, kitabî hîna zaf î.”
