Mektûbê hepsîyan Lozan de yenî nawitene

Sergîya fotografan ke hetê fotografkêşan ra bi goreyê mektûbê hepsîyan ameyî antene, Sîon, Bern û Basel ra dima nika zî bajarê Lozanî de yena nawitene.

Akerdişê sergîya fotografan ke hetê fotografkêşan ra bi goreyê mektûbê hepsîyan ameyî antene bajarê Sîon de ameybî kerdene û dima ra dore reyde Bern û Basel de zî sergî amebî nawitene. Na sergîye nika zî Lozan de yena nawitene.

Na aktîvîte hetê ekîbê ‘Ameyo dîyayene’ û grûba fotografkêşan ya Redî ra ameya organîze kerdene û 68 hepsîyî û 60 fotografkêşî beşdarê na aktîvîte bîyî. Akerdişê sergîye Merkezê Komelê Kurdistanîyê Demokratîke (CDK) de ame kerdene.

Sergî do heta 5ê teşrîna verêne dewam bikero. Merdimê hepsîyan zî beşdarê sergîye bîyî. Nînan ra yewe zî cinîya hepsîyo bi nameyê Kasim Karataşî Ayşe Karataşe ya.

Karataşe ANFyî rê qisey kerde û kêfweşîya xo arde ziwan. Karataşe va ‘na sergîye seba eşnawitişê vengê hepsîyan, gamêka muhîme ya’ û wina domnaye: “Mêrdeyê mi de nêweşîya qelbî esta û 28 serrî ra zêde yo ke zîndan de yo. Ez 4 serrî yo ke Swîsre de cuyena û têkilîya mi mêrdeyê mi reyde nêmenda. Nika rojeve de efû esto, labelê kamî rê yeno dayene? Mafya, qatil û dizdan rê yenî dayene û ma rê zî zîndanan ra girewtişê cenazeyan rewa yeno dîyayene.”

Sergîye do 5ê teşrîna verêne ra dima Parîs de bêro nîşan dayene.