Merdimê tepişteyan: Heta tecrîd nêro şikitene xoverdayîş do bidomno

Mayê tepişteyan ê ke hemverê tecrîdkerdişê Rayberê Şarê Kurdî Abdullah Ocalanî de grevê vêşanîye de yê, peyamê „Xoverdayîş heta netîce bigêro do dewam bikero.“

Merdimê tepişteyan ê ke hemverê Rayberê Şarê Kurdî Abdullah Ocalanî de tewrê grevê vêşanîye yo ke 16’ê Kanûne ra dest pêkerdo bîyê ANF’yî rê qisey kerd. Tepişteyan û keyeyanê înan peyamê xo de vat heta tecrîd nêro şikitene do xoverdayîş dewam bikero.

Tepişteyê ke hemverê tecrîdê Îmraliyî grevê vêşanîye de yê înan ra yew zî Mîzar Aydin o ke Zîndanê Tekîrdagî yê Girewteyî yê Tîpê F’yî de maneno. Aydin 49 rojî yo grevê vêşanîye de yo. Maya Mîzar Aydinî yo ke grevê vêşanîye de yo Gejwer Aydine vat „Çalakîya înan seba Rayberîye û seba şarî ya. Ez sey maya ci ça çi gure beno ci rê amade ya. Wa selahîyetdarî bibê serkêş. Eke ma bibê yew ma do vengêkê hîna berzî bidê.“  

Latîfe Aydin a ke lajê ci Abdullah Aydin 28 serrî yo zîndan de yo û 2 torinê ci grevê vêşanîye de yê hemverê bêvengîye de reaksîyon da û vat, „7000 hezarî kesî grevê vêşanîye de yê. Senî şar hema zî peygoş keno. Ma mayî bê aşitîye çîyêna nêwazenê. Maya leşkeran zî, maya gerîlayan zî û ez zî ma tena aşitî wazenê. Çîyo ke beno bi ma beno û bi domananê ma benoç 28 serrî yo lajê mi mi ra dûrî yo zîndan de yo. Ez hewna zî boya cilanê ci ancena xo zerre. Ez bi ê derd û kulanê xo aşt kena.“  

Suleyman Acûno ke 3 serrî yo tepişte yo keyeyê xo dir pêvînayîş kerd û nê vatî, „Ma seba waştişêkê heqdarî xo ver danê. Heta waştişê ma bêrê bicaardene ma do mucadele bikerê. Şima zî teber de veng vejê. Çalakîya ma ancax gama ke teber ra paştî bidîyo do bi ser bikewo.“ Maye Acûne vat lajê û tepiştayê bînî yê ke grev de yê xeylî kîlo kerda vînî û vat, „Ancî zî moralê tepişteyan berz o. Pîya bi înan seke ma zî grevê vêşanîye de bê. Her loqmeyo ke ma wenê qirika ma ra nêşino warî. Ganî no tecrîd bêro wedaritene, grevê vêşanîye hendî biqedîyo.“ 

Maye Makbule Dîkmene 8’ê Nîsane de şî pêvînayîşê lajê xo. Maye Dîkmene nê vatî: „Tena Mehmet Saît nê, heme embazê ê helîyayê. Ê 11 kîlo daya. Hende bibi zihîf ke xo ra kewtibi û mi nêwaştêne ez ê nê halî de bivînî. Mehmet Saît verê 1’ê Adare zî 10 rojî kewtibi grevê vêşanîye. Waştişê înan bewlî yê, waştişê ma bewlî yê. Heta ma dest ra yeno ma çalakîyanê xo kenê la no kar tena bi ma nêbeno. Bêvengî xo dir mergî ana. Ez sey maya înan tena gureyê mi no yo ke paştî bidî na çalakîye. Înşalah do bi ser bikewê û bibê serfiraz.“