Mîkaîl Aslanî konserê Êlîhî de bale ante muhîmîya ziwanê dayîke ser

Hunermend Mîkaîl Aslanî konserê Şaredarîya Êlîhî de ca girewt û pare kerd ke ganî ziwanê dayîke bêro xebitnayene û averberdene.

Şaredarîya Êlîhî çarçewa aktîvîteyanê kultur û hunerî de vizêr şande konserêk serûber kerd. Konser Merkezê Kulturî û Hunerî yê Ahmet Guneştekînî de ame dayene û konserî de Mîkaîl Aslan vejîya sehneyî ser. Zaf kesî tewrê konserî bîyî û Aslanî deyîrê xo yê weşî pêşkêşê goştarîkerdoxan kerdî.

Aslanî îfade kerd ke huner û hunermendan  ser o tedayêka pîle esta û vat: "Ez nêeşkena xo hîna asan îfade bika. Key ma qisey bikê seke ma hê îfade danê." Aslanî pare kerd ke o bi xo kirmanc o la kurmanckî zî zaneno û ganî ziwanê dayîke bêro pawitene û averberdene.

"Wexto ke merdim na dinya ra şino vengê ci tîya de maneno. Hozanî, dengbêjî na dinya ra şîyî la vengê xo verdayî. Ma vengê înan seba xo sey rayberêkî gênê. Çi rind o ke înan vengê xo sey mîrasî verdayî û ma zî xizimkarê nê mîrasî yê."

Konserî ra dima Hemserekê Şaredarîya Êlîhî Mehmet Demîrî plaketêk da Mîkaîl Aslanî û ci rê sipas kerd. Demîrî ard ziwan ke ê wazenê Elîhî de orkestraya senfonîyî awan bikê û seba naye venga hunermendan da ke paştî bidê Şaredarîya Elîhî.