Lalehan Uysale ya komelnase Parkê Merkezî yê Seyhanî yê Edeneyî de pêramotişêkê bi nameyê ‘Mucewherê Cuye’ viraşt. Uysale nê pêramotişî de bi seyan fotografanê toximan ramojnena.

Uysale vat: “Mi di çîyê ke cuya mi de muhîm bîyî ardî têhet. Toximî û fotografî. Amacê mi toximan ramotiş bi. Mi dima ra fam kerd ke ancax ez înan bi fotografanê zaf estetîkan eşkena bidî ferqkerdene.”

 ‘CEWHERÊ CUYE TOXIM O’

Uysale hedefê xo wina ard ziwan:

“Merdimî ne zanê toximê çîyanê ke wenê çi yê, ne zî toximanê darêk ke bi vayêk şinê coxrafyayêka bîne ferq kenê. Înan kerdo xo vîr ra ke perçeyêkê xoza yê. Dinya bi çerxanê xoza mîyan de şina, toxim zî… Cewherê cuye toxim o!”

 ‘ÊYÊ TEWR ZORÎ GUZINÊ ÎNAN Ê’

Sey sebebêkê meşxuldarîya aye ya bi fotografkarîye Uysale vat: “Toxim zî fotograf zî cuya mi de tim estbî. Ganî mi her diyan bikerdêne yew.”

Dewamê qiseykerdişî de Uysale vat: “Fotografanê mi de fîltre, rotuş yan zî photoshop çinyo. Ez mudaxeleyê toximan zî nêkena. Çîyo ke ez kena nizd ra ewnîyayîşê înan o. Mîyanê toximan de êyê ke bikaprîs ê, cayê xo de nêvindenê estê. Êyê ke lez benê xira zî estê. Êyê ke tewr zor ê êyê guzin ê. Gama mi îsotê Dîlokî antî xeylî hesrî çimanê mi ra ameyî.”

 ‘ŞÎYÊ WAŞTIŞÊ TOXIMAN’

Goreyê Uysale ra ma zî toxim ê, sey dara ke ma versîya ci de ronişenê. Uysala ke muhîmîya toximî sey ‘toxim çimeyê cuye yo’ ana ziwan wina qisey kerd :

“Verî seba cihêzê keynayan toximî ameyê dayene. Kesê ke merdêne toximêkê darêk kerdêne înan dest. Cinîyanê yorukan toximî kerdêne milê xo, koçê çayî bikerdêne ûca karitêne. Sukur hema zî kokimê ma yê ke seba toximî rewayî ra bipawê înan mîyanê welî de nimnenê estê. Toxim çimeyê cuye yo. La çi heyf ke merdimî kenê xo vîr ra ê zî toximêk ê ! Ma zî yew toxim ê, sey dara ke ma versîya ci de ronişenê !”