Pêşangehê fotografan, Keyeyê Şarî yê Medya de ame akerdene. Babeta fotografanê Îsmaîl Mamleyî xoverdayîşê Kobanê yo.

Şarê Kurdî ra û dostanê ci ra xeylî kesî beşdarê programê akerdişî bîyî û pêşangeh zîyaret kerd. Xoverdayoxanê grevê vêşanîye ra Şîyar Xelîl zî beşdarê akerdişê peşangehî bi û qiseykerdişêk kerd. Xelîlî wina va: “No proses de ganî her kes destê xo bino wîjdanê xo ser û bêveng nêmano û wayîrê xoverdayîşî bivejîyo. Her keso ke vano ez merdim o ganî bêveng nêmano. Şaro Kurd, bi taybetî zî Kurdê ke Ewropa de yê xoverdayîşî hîna bikê pêt.“

Hunermend Îsmaîl Mamleyî zî akerdişê pêşangehî de qisey kerd û wina va: ”Hêrişê barbarî yê DAÎŞ’î ver, xoverdayîşêko bêemsal ame dayene û Kobanê ameye azadkerdene.  YPG’yî, YPJ’yî bi qehremanîye xo ver da. Bi taybetî zî cinîyan ê YPJ’yîyan xoverdayîşêko bêemsal da. Cinîyan ê Kurdan vera DAÎŞ’î mucadeleyêko berz da. Nê mucadele û xoverdayîşî peynîya DAÎŞ’î arde. Ez wazena ke fotografanê nê xoverdayîşî her kes bivîno.”