Polîsan Mêrdîn de dayîkî erd ra kaş kerdî!

Dayîkanê Haştîye ke Qoserê Mêrdînî de waşt ke bale binace serê grevê vêşanîye, îşkenceyê polîsan rê marûz mendî. Polîsan dayîkî erd ra kaş kerdî.

Polîsan vizêr Gebze de bi copan hêrîşê dayîkanê pîran kerd. Hema no hêriş rojdem de yo ke xeberêka  bîne yê hêrişê polîsan zî Mêrdîn ra ameye. Polîsan Qoser de dayîkî erd ra kaş kerdî.

Qoserê Mêrdînî de Dayîkanê Haştîye waşt bi çalakîya roniştişî bale biance serê grevê vêîşanîye. Îdarekaranê HDP û DBP’yî zî paştî daye înan. Polîsan hêrişê dayîkan kerd pankartê înan dest ra girewtî û destur nêda eşkeraye bidê.

Rixmê hêrişê polîsan, dayîkan ra Hevlet Oncu dest bi eşkerayî kerde û vat ke hinî tehamuhmûlê ma nêmend. Ma nêeşkenê yewna cenaze wedare. Polîsan nêverda dayîke dewamê qiseykerdişê xo bîyaro. Hêrişê ci kerd. Polîsan Dayîka Hevlet Oncu erd ra kaş kerd. Hêrişê de xeylî kesî bîyî birîndar. 3 kesî zî ameyî destbendkerdene. Hêrişî ra dima şar Meydanê Qoserî de ame pêser û vera hêrişê polîsan reaksîyon da. Polîs tîya zî hêrişê şarî  kerd û 2 kesê bînî dest bend kerdî.