Tabloyê 'Tîja Homete' Bern de dîya naskerdene

Resamo Swîsreyij o namdar Oscar Weîssî, tabloyê xo yo ke bi nameyê ‘Tîja Homete‘ name kerdîbî, paytextê Swîsre Bern de da şinasnayene. Tablo de rîtuel û bawerîyê Elewîyan ameyê xêzkerdene.

Tabloyê Tîja Homete'  yo ke tede  rîtuel û bawerîyê Elewîyan ameyê xêzkerdene Bern de dîya naskerdene.

Swîsreyijan xeylî eleqe musnaye daşinasnayişê tabloyî û reyna xeylî Elewî û dostê Elewîyan beşdarê programî bîyî. Tablo Keyeyê Bawerîyan o ke Bern de yo de ame daşinasnayene û no mekan her bawerîye rê akerde yo. Program de bi nameyê FEDA’yî Songul Çelîke qisey kerd. Peyê cû gulbang ame dayene û loqmeyî ameyî vilakerdene.

Serekê Keyeyê Bawerîyan (Haus der Relîgîon) Regula Maderî akerdişê programî de qisey kerd û va: “Keyeyê Bawerîyan sey Hîndu, Budîst, Xirîstîyan, Misliman, Elewî û Yahudî zî tede xeylî bawerîyan rê berê xo akeno û bawerîyanê pêroyê dinyaye binê yew banî de ano têhet û no çîyêko zaf hêja yo.“ Îdarekaranê Keyeyê Bawerîye ra Davîd Leutwîllerî zî qiseykerdişê xo de bale ante tabloyê ‘Tîja Homete‘ ser û wina va: “Tabloyê Tîja Homete hetê hunerî ra xebatêka zaf bêemsal a. Bawerîya Reya Heqî nîşan dano.“

Temsîlkara Dergahê Elewîyan ê Bernî Selvî Demîre zî qiseykerdişê xo de bale ante bawerîyanê Mezopotamya ser û wina va: “Tîje, aşme, şîlane, qulinge, bilbil, tum û koyê bimbarekî, dara zîyare, û çar elementî; awe, adir, hewa û herre (wele) sembolê bawerîyanê Mezopotamya yê û tabloyê Tîja Homete de bi hawayê estetîkî ameyê resmkerdene.“

Qiseykerdişan ra dima Lale Koçgîrî û gruba xo vejîyayî sahne ser û beşdarvanan rê muzîk cina.

Karîkaturîst û resam Oscar Weîss, 24’ê Çele 1944 de, bajarê Swîsre Chur de ameyo dinyaye. Serra 1963‘î ra heta 1968’î, Zurîh de dibistana hunerî de dersê grafîkî dîyê. Sey Dîe Weltwoche, Neue Zûrcher Zeîtung, Nebelspalter ve Berner Zeîtung, xeylî rojnameyan de karîkaturî xêz kerdê. Xeylî galerîyan de resmê dêsan xêz kerdî û seba doman û pîlan xeylî kitabê ci ameyê çapkerdene.