Gokçen (63) ke Mêrdîn de atolyeya xo de westayê deqkerdiş û rolyefî yo hunerê xo ser o wina vat “Seba ke ez nê hunerî zerrî ra kena ez nêewna ke ci ra çend pere yeno. Wendekar û mêmanê ke yenê tîya reyde ma wextê xo weş vîyarnenê.  Rojanê muzayan de, demê xebatanê kuçeyan de mi berê atolyaya xo xebatan rê akerd. A rojê nêzdîyê hezar merdimî atolyaya mi zîyaret kerde. Ganî merdim hunerî seba bazirganî mekero la gegane şertê aborî yenê verê merdimî û merdim mecbur maneno ke aborî zî bifikirîyo. Mi dest bi nê karî kerdo nêkerdo  hetê madî ra mi zaf zehmedî dî la reyna zî mi mabên nêda nê karê xo.”

Cad Keno ke Kulture Kurdan Bida Ciwîyayenê

Gokçenî vat “hunerê deqkerdişî de cad keno ke kulturê Kurdan û ê Mezapotamya bidera ciwîyayene. Ahura Mazda, Şayê Maran, Zihayê Firat û Dîcle, Dewrêşê Evdî û Edûle, Sumer, Asur û Medan ser o nêzdîyê 200 berhemî mi viraştê. Gelek xebatê min ê portreyan dewam kenê. Reyna mi gelek portreyê namdaranê kurdan zî viraştê. Eyşa Şane ra bigîrê heta Mela Mistefa Barzanî mi resmê gelekan textikî ser o deq kerdî.”

‘Kesê ke Wazenê Eşkena Seba Înan Xêz Bikera La Nê Seba Rotişî Nîyê‘

Atolye de gelek portreyê namdaranê Kurdan estbî ke ma vayê înan pers kerd Gokçenî vat “ez senî nê portreyan biroşa. Ez ke biroşa ne hurmetê hunerê xo kena ne zî hurmetê nê kesanê ke ez portreya înan virazena kena. Nê şerefê min ê, merdim eşkeno şerefê xo biroşo. Kesê ke wazenê eşkena seba înan xêz bikera la nê seba rotişî nîyê.

Gokçenî dîyar kerd ke o hîna zaf tarîxî ser o vindeno û dewam kerd “Çîyo ke mi virazeno hunerê mi de zî xo nîşan dano. Ez kulturê Kurdan ra îlham gêna, ez naye bi hunerê xo zî nîşan dana. Kurdî zinaatkar bî, hunermend bî û bi her maneyê ke verî ameyê ciwîyayene naye dîyar kena. Mi cad kerd ke nasnameyê xo yê Kurdî bi hunerê xo seba şarê xo veja warye.

‘Ganî Ma Huner û Tarîxê Xo rê Wayîr Vejîyê‘

Gokçenî tewr peynî de va o Beşê Resim û Heykelviraştiş ê Fakulteya Unîversîteya Artûklûyî de dersan dano û vat “ganî hunerê deqkerdişî yê Kurdan biciwîyo. Seba na yewe çi ke bikewo mi ser ez amede ya. Ganî ma nê hunerî biresnê demê ameyoxî. Ez hêvî kena ke azê ma tarîx û hunerê ma ra wayîr vejîyenê.”