Agît û Arîne gerîlayê ke vera artêşa tirkî ke waştêne girê Lêlikanî dagîr bikero de beşdarê çalakîya sifteyîne bîyî ra yî. Guleyê sifteyînî yê Arîne veng ra şi, labelê guleyê peyêne yê Agîtî reyde Arîne xelisîyaye.
Artêşa tirkî ke aşma kanûne ra nata game bi game hewl dana Başûrê Kurdîstanî dagîr bikera û girê Lêlîkanî de ca bîya, hedefê gerîlayan de ya. Seba ke artêşa tirkî her çalakîye de vînîbîyayeyanê girdan dana, hertim hêzan bedilnena û hêzanê teqwîyeyan ana. 2 gerîlayê ke beşdarê çalakîya sifteyîne ya girê Lêlikanî bîyî, derheqê çîyê ke cuyayî de qisey kerdî.
Gerîla Agît Welat ANFyî rê qisey kerd û qala çalakîya sifteyîne kerde:
VERA DAGÎRKERÎYE DE ÇALAKÎYA SIFTEYÎNE
Wexto ke ma çalakîya sifteyîne viraştêne, bitaybetî yê ke herêma Lêlikanî de bî, ma ra çalakîyêka tesîrine pawitêne. Artêşa tirkî newe girê Lêlikanî dagîr kerdbî. Armancê çalakîye pirodayîşê derbêka girde bî. Hûmara embazê ke beşdarê çalakîye bîyî, zaf nebîye. Xora armanc zî no bi; bi hûmarêka taye derbêka gird pirodayîş. Çalakîye de destê mi de sîlehê Zagrosî ke gerîla modîfe kerdo, estbi. Ma seba destpêkê çalakîye paweyê talîmatê embaz Bagerî bî. Heyecanêko gird estbi û merdim nêşêno qala ê heyecanî bikero.
Şehîd Agirî ke nameyê ci dîyabi hemle, şertanê tewr zehmetinan de zî embazanê xo motîve kerdêne. Ganî ma zî layîqê ci bibîyêne û goreyê mîlîtanîya Rayber Apoyî hereket bikerdêne. Mi rîyê her embazî de serkewtişî dîyêne. Ma bi rik û hêrsêko gird ver bi girê Lêlikanî kewtî rayîr.
15 deqa çalakîye rê mendbî, mi cayê xo girewt û mi sîlehê xo amade kerd. Goşê mi bêtel de, çimê mi durbîn de û destê mi zî tetîka sîlehî de bî. Heme grûbî tekmîlê xo dabî û wexto ke dore ameye mi, mi zî va ‘ez amade ya’. Çend deqayî girê Lêlikanî de bêvengîya mergî virazîyaye. Embaz Bagerî talîmatê ‘Dest pêbikerê’ da û çalakîye bi sîlehê B7 û hewanan dest pêkerd. Hêzê tirkan şok bîbî û zafaneyê înan remayêne.
EKE MI NÊDAYÊNE PIRO, EY DAYÊNE ARÎNE RO
Suîqestvanê tirkan vejîya zinarî ser û mi ey dî. Senî ke mi dî, mi hetê xo de va ‘ganî ez bida ey ro’. Wexto ke mi nîşan girewt, mi eşnawit ke embaz Mîrxan birîndar bîyo. Ez hêrs bîya û ganî tesilî mi bidayêne ey ro. Ez vindeta û senî ke sereyê xo hewana, mi da piro. No guleyê min yê sifteyîn bi; leşker kewt. Dima ra ame fam kerdene ke mi Arîne xelisnaya. Wexto ke mi dayêne suîqestvanî ro, seba ke guleyê B7î yê Arîne qedîyabî, aye binê zinaro ke hedefê ê suîqestvanî de bî, ewja de mendbî. Arîne zî aye vîste de zerrîya xo de vato ‘Gelo ti kes çin o ke bido nêyî ro?’.
ARÎN STÊRKE QISEY KENA
Gerîla Arîn Stêrke zî qala çalakîye kerde û wina va:
Ganî ma artêşa tirkî ke girê Lêlikanî dagîr kerdbî, poşman bikerdêne. Seba çalakîyî planî virazîyayî. Her embazî seba grûba hêrişî xo pêşnîyaz kerdêne. Aye roje şansê mi estbi û ez seba grûba hêrişî ameya weçînayene. Mi perwerdeyê sîlehê B7î dîbi. Çalakîye ra ver moral û coşê ma zaf bi. Ma ver bi girê Lêlikanî kewtî rayîr û barê mi zaf giran bi. Mi guleyê B7î kiriştêne, Serdemî zî sîlehî kirişt. Çalakîye di başkan ra pê ameyêne. Basko yewin de Hawar, basko dîyine de zî Mîrxan estbi. Ma saeta ke ameybî dîyar kerdene de resayî cayê xo. Hewa mijin bi û no seba mi avantaj bi. To vatêne qey tebîet zî vera artêşa tirkî ya dagîrkere de bi.
GULEYO PUÇ RA DIMA
Mi nîşan girewt û pana, labelê guleyê mi puç vejîya. Cok ra çalakîye çend deqa erey dest pêkerde. Mi guleyêko newe pakerd û pana. Meterîsê dişmenî îmha bi û çalakîye dest pêkerde. Mîrxan û Serdem dest bi hêrişî kerdî. Ez zî seba ke şêra cayêko hîna cor, mi dî ke 3 leşkerî kewtî meterîsêk mîyan. Ganî mi ê meterîsî çin bikerdêne. Mi nîşan girewt û pana, o meterîs zî îmha bi. O wext mabênê mi û Mîrxan û Serdemî de mesafe zêde bi. Ez hetêk ra leşkeran reyde şer kena û heto bîn de zî hewl dana xo biresna embazan. Wexto ke çalakîye dest pêkerd, zafaneyê leşkeran remayêne. Leşkerêk zî qîrayêne û vatêne ‘Îbrahîm ha yenî, Îbrahîm ha yenî’. O wext Mîrxan birîndar bi. Serdem zî seba ke Mîrxan biresno cayêko biewle, cayê pêrodayîşî ra durî kewt.
EZ MÎYANÊ ZINARAN DE MENDA
Mi dî ke leşkerêk mîyanê meterîsî de yo. Labelê guleyê mi qedîyabî û ez mîyanê zinaran de mendbîya. Mi nêzanayêne ke ez se bikera. Ez tay ewja de menda, leşkeran zî cayê mi ser o gule varnayêne. Suîqestvanêk ez hedef girewtêne û dayêne mi ro. Cade vengê sîlehê suîqestvanî birîya. Mi senî ke sereyê xo wedarna, mi dî ke suîqestvan merdo. Ez cade tepîya ancîyaya û şîya hetê gerîlayanê bînan. Embaz Bagerî bêtel ra va ‘êdî xo tepîya biancê, nika hende bes o’. Çalakîye bi hawayo serkewte derbaz bîye û ma derbe da dişmenî ro û cesaretê dişmenî şikit.
