Fermandarê YJA STAR HPGyî yê ke nê serrewextê zimistanî de hemverê hêzanê dewleta Tirkî ya îşxalkare de bêvindertiş xo ver danê vat ke wa şarê Tirkîye goş nêdê zûranê artêşa îşxalkare ya Tirkî.

NÊEŞKENÊ NETÎCE BIGÎRÊ

Fermandaranê YJA STARî ra Tekoşîn Toprake vat ke wisarî ra nata artêşa Tirkî sîyasetêkê hîna xorîyî hemverê gerîlayan de ray ra bena û nê vatî: “Xusûsen înan waşt ke gerîla û Ocalanî û gerîla û şarî yewbînan ra cîya bikerê. Teknîkê antî propagandayî vet derecea tewr berze. Nê hêriş û polîtîkayî hewna dewam kenê. La vejîya meydan ke vatişê sey ‘mi qedêna, ez qedênena’ bênetîce mendî, veng vejîyayî.”

Toprake dewamê qiseykerdişê xo de vat eke dewlete netîceyêk girewto no kulturê gerîlatî û mîrasê ci yê tarîxkîyî dir eleqedar o. Gerîla heme şertan de xo organîze keno û çalakî virazeno. Gerîlayê Apoperwerî do her şertî de mucadeleyê azadîye ray ra berê.”

DIŞMEN MEHKÛMÊ TEKNÎKÎ YO

Toprake vat rixmê serrewextê zimistanî û heme teknîkê dişmenî zî gerîla halê viraştişê çalakîyan de yo. Toprake ard vîrî ke ê hemverê îşxalkerdişê Başûrê Kurdistanî yê dewleta Tirkî de wayîrê vindertişêkê xeylî xurtî bîyê û wina dewam kerd: “Rayber Apoyî tim vatêne ke teknîko ke destê dişmenî de yo ma dest de çinyo, la ardêne ma vîr ke ma gerîla yê û wina vatêne ‘oyo ke teknîk îcad kerdo merdim o, teknîko tewr pîl merdim o.’ Ma bi rayberîya nê fikrî hemverê hêrişanê ke Wareyê Pawitişî yê Medya ser o ameyêne kerdene vindertî.”

Fermandaranê ciwanan ê HPGyî ra Erdal Serdeştî zî vat ke dewleta Tirkî 41 serrî yo xo û rayapêroyîye xapênena û nê vatî: “Dewleta Tirkî tim vana ‘ewro mebo meşte, emser mebo serrna ez PKKyî qedênena’ bi nê vatişan tim xo tekrar kena. La hetêna ra gerîla û PKK her serre xo keno newe û xurt beno.. Seba ke destê ci de sewbîna çîyêk çinyo heme giranîya xo dana teknîkî ser.”

Serdeştî bale ante zûranê medyaya Tirkî û wina vat: “Ganî şarê Tirkîye zûranê medyaya Tirkî ra bawer nêkero. Ganî rîyê şerî yo raştekîn bêro dîyene, şarê Tirkîye wa wehşeto ke artêşa Tirkî ya îşxalkare şarê Kurdistanî ser o bica ana bivîno.”      

ZIMISTAN AME GERÎLA NÊVINDENO

Serdeştî qiseykerdişê xo rê wina dewam kerd: “Şer bi hawayêkê cidîyî şarî keno feqîr. Ganî şarê Tirkŷe bivînê ke îqtîdar çende şino beno zengîn û ê bi xo benê feqîr. Înan menganê ewilênan ê na sere de vatêne ke ma PKK emser qedênenê, La ma nika menga zimistanî de yê û xoverdayîşê ma dewam keno. Wa şarê Tirkîye na raştîye ser o bifikro û ferq bikero.”

Serdeştî peynîya qiseykerdişê xo de vat: “Ma kewtî zimistan, gerîlayî bargehê xo tesîs kerdê û çalakîyanê xo rê dewam keno. Dewlete vana ke  ‘leşkerê ma qeresîyayê, qeza bîya yan zî vîndîbîyayeyê perwerdeyî yê’ bi nê vatişan wazena kişteyanê xo binimno. Amacê ma azadîya Rayber Apoyî ya fîzîkkî ya. Gerîlayê azadîya Kurdistanî do heme wehşeto ke serê şarê ci de yo vindarno.”