Îqtîdarê AKPyî yo faşîst seba qedênayîşê grevanê vêşanîye ke bi amacê wedartişê tecrîdê serê rayberê şarê Kurdî Abdullah Ocalanî zîndanan û merkezanê HDPyî de ameyê destpêkerdene zext û zulmê her tewirî bica ano.

Dimayo ke HDPyîyan reyna banê bajarî yê HDPyî yê Amedî de kewtî grevê vêşanîye raştê sereştişê bi hezaran polîsan ameyî. Sereştiş de 50 kesê ke grevê vêşanîye de bî ameyî destbendkerdene. Çalakwanê ke ameyî destbendkerdene verê destbendkerdişî ANFyî rê qisey kerd û vat waştişê Leyla Guvene waştişê şarî yo.     

CAYO KE ZULM Û ZEXT ESTO XOVERDAYÎŞ ZÎ ESTO

Hemserekê HDPyî yê Sûrî Mehmet Alî Altinkaynakî ard vîrî ke parlamentera Colemêrgî û hemsereka KCDyî Leyla Guvene 36 rojî yê ke grevê vêşanîye yê bêdem-bêagêrayîşî de ya û wina vat: “AKP-MHPyo faşîst seba grevanê vêşanîye yê ke her cayê welatî rê vila bîyê biqedêno hêrişê şarî keno, çalakwanan destbend keno. Wazenê ke bi hêriş, destbendkerdiş û tepiştişan bi şarî çok bidê ronayene. Cayo ke zulm û zext esto xoverdayîş zî esto.AKP zano ke HDP do weçînitişan ra bihêz vejîyo, naye ra wazenê hêzê ci bişikno. Ma heqdar ê, ma do qezenc bikerê.” 

'ROJ BI ROJE MA DO HÎNA BIBÊ BIHÊZ ÇUNKE MA HEQDAR Ê'

Hemwelatijo bi nameyê Hecî Hasan Uyanî zî vat ê do çalakîyanê xo heme herêman de vila bikerê û wina qisey kerd: “Ma ewro bi grûbêka 50 kesan kewtî grev, meşte do 70 kes bikewo. Tu hêz nêeşkeno çalakîya ma biqedêno. Heta tecrîdê serê birêz Ocalanî biqedîyo do çalakîyê ma dewam bikerê.”

Hemserekê HDPyî yê Farqînî Mehmet Taşî zî vat ke 19 serrî yê ke Îmrali de tecrîd yeno bicaardene û nê vatî: “Aşitî seba heme şaran lazim a. Ê çiqa hêriş bikerê ma do zî hende xover bidê. Ma bi nê hêrişan nêbenê kemî, hîna benê vêşî. Çunke ma heqdar ê.”  

TECRÎD SÛCÊ MERDIMÎYE YO

Hemserekê HDPyî yê qezaya Licê Nîyazî Erdoganî zî bale ante serra 2016î ran ata Ocalanî ra xebere nêna girewtene û wina vat: “Eke Ocalan azad bibo do şarê Kurdî zî azad bibo.” Hemsereka DBPyî ya qezaya Sûrî Sakîne Karadenîze zî vat ê do heta peynî kîşta Leyla Guvene de bibê.

Medya Kartale zî vat ke nimûneyêko bîn ê tecrîdo ke serê Ocalanî de yeno bicaardene çinyo. Mehmet Yamanî zî vat ke ê do hemverê hêrişan de çirey game peyde nêerzê.