Îpekyuz: Hêrişî xoverdayîşê şarê ma hîna kenê xurt

Parlamenterê HDPyî Nejdet Îpekyuzî derheqê hêrişanê qirkerdişê sîyasîyî de fikrê xo ardî ziwan û vat „Seva ke destkewteyanê ma krîmînalîze bikerê hêriş kenê. La nê hêrişî xoverdayîşê şarê ma hîna kenê xurt.“

Roja 9ê Teşrîna verêne sere de Amed xeylî şaristananê Kurdistan û Tirkîye de hemverê sazîyanê Kurdan de operasyonî ameybî dest pêkerdene û nê operasyonan de 300 kes gîrîyabi binê nezaretî.

Amed de 151 kesê ke derheqê înan de qerarê tepiştişî estbi înan ra 120 kesan ra vêşêr gîrîyabî binê nezaretî. Nê kesan ra heta vizêr 23 kesî ameyî tewqîfkerdene, 78 kesî zî bi şertê kontrolê edlîyî serbest veradîyayî.   

Parlamenterê HDPyî yê Êlîhî Nejdet Îpekyuzî yo ke fikrê xo yê derheqê nê hêrişan de ANFyî rê ardî ziwan vat ke hem parlamenterê înan hem zî hemserekê partîya înan seva ke êyê ke gîrîyayê binê nezaretî û yan zî ameyê tewqîfkerdene bêrê veradayene xebate kenê.

'PARTÎYA MA DEST BI XEBATANÊ WEÇÎNITIŞÎ KERDE'

Îpekyuzî hêrişê serê hemserekanê şaredarîyan û aktîvîstan ardî vîr û vat: „Embazê ma yê ke destê înan ameybî kelepçekerdene hewna zî nêameyê vîrrakerdene. Dima ra zî înan vat nê hêrişî FETOyî kerdê. Netîce de se beno wa bibo seva ke destkewteyanê ma krîmînalîze û asteng bikerê wina kenê.

Hetêk ra munaqeşeyê derheqê weçîntişanê herêmeyîyan de dewam kenê û partîya ma zî dest bi xebatanê xo kerda. Nê xebatan de ma xo krîtîk kenê, kemasîyê ma çi yê ma do nînan ser o vinderê. Heman wext de ma dest bi xebatanê ke heme dormeyan gênê xo mîyan zî kerdê.“

“MA GANÎ NÊ KEYEYÎ RA YEWÎ BIGÎRÊ, KAM WAZENO KE  BÊRO?”

Îpekyuzî qiseykerdişê xo wina dewam kerd: „Dewlete eşkarayîyê ke partîya ma hedef ramojnena vila kerdî. Tewr peynî ameyî nuqteya vatişê „Ê qezenc bikerê zî ma do qeyûman wezîfedar bikerê“. Hemverê nê vatişî de zî xebatê ma dewam kenê.

Sere de înan Êlîh de destpêkê nê hêrişan kerd. Dima ra zî merkezê ci Amed xeylî şaristanan de bi seyan kesî gîrîyayî binê nezaretî. Heta Êlîh de vatê ke „Ganî ma nêkeyeyî ra yewî bigîrê, kam wazeno bêro“. Ez bi xo zî şîya ê keyeyî û înan dir qisey kerd.“

'HÊRIŞÎ KEYFÎ YÊ'

Îpekyuzî dima ra ard ziwan ke nê hêrişî keyfî yê û qiseykerdişê xo wina temam kerd: „Tedeyîyê dosyayan tal ê, na yewe ra ewnênê nê kesan serran verî fealîyetêk kerdê nêkerdê. Seva ke huqûqî zemînêk xo rê virazê rayîrêk înan rê lazim bi ke o zî „şahido nimite“ yan zî „îxbar“ o.

Gama ma ewnênê nê heme çîyan ra vînenê ke nê hêrişî keyfî yê. Wazenê ke wextê nê hêrişan derg kerê û heta weçîntişanê herêmeyîyan şewq û waştişê şarî bişiknê.“