Endamê Komîteya Bawerî û Şaran ya KCKyî Cîhan Erenî ajansê ANFyî rê qisey kerd û beşê sifteyînî yê qiseykerdişê xo de babetanê hetê îqtîdaranê tirkan ra qebulbîyayîşê îslamî, dima ra bikarardişê înan yê îslamî û dewletbîyayîşê tirkan de rolê îslamî ser o vindet.

TIRK LEŞKERÊ ÎSLAMÎ YO

Erenî qiseykerdişê xo de qala têkilîya tirk û îslamî kerd û wina va: “Seke yeno zanayene tirkî seserra 9 û 10. de yenî Rojhelato Mîyanên. O wext Împaratorîya Abbasîyan ya Îslamî hakim a û mîyanê împaratorîye de xeylê nakokîyî estî. Reyna mîyanê îslamî de munaqeşeyê felsefîk, ilmî û sosyolojîkî estî. Mezhebê Mutezîle û Eşarîyî û teber ra zî tehdîdê rojawanî Rojhelatê Mîyanênî ser o estî. Wexto ke tirkî yenî Rojhelato Mîyanên, bawerîya înan totem o. Yanî her eşîre goreyê xo bawerîya ci esta. Seba ke o wext îslamo îqtîdar hakim o, lazimîye bi hêzêko ci bikero îqtîdar esta. Lajanê Harun Reşîdî ra Emîn û heme xelîfeyê bînî tirkan reyde têkilîye ronenî û serekeşîranê tirkan ancenî hetê xo. Nê tirkî tirkmanan kenî kole. O wext fikrê sey tirk leşkerê îslamî yo’ esto.”

Erenî qala sebebanê nêyî kerd û wina va: “Seba ke tirkî xerîb î, dîn nêzanî, erdê înan çin o seba xebetnayîşî munasîb î. Erebî nê zanî û goreyê menfîetê xo bikar anî. O wext serekeşîrê tirkan vanî ‘seba ke ma tîya de bimanî û erdê ma bibo, ganî ma ser nameyê îslamî şer bikerî û meşrûîyetê îslamî awan bikerî’. O wext îqtîdarê ereban hakimîya xo awan kenî; çimkî xo rê leşkerê neweyî dîyî. Tirkî çiqas seba îslamî şer kenî, hende hetê şaranê bînan ra yenî qebul kerdene. Çimkî o wext fikrê ummetî hakim o. No donem de Seferê Xaçperestan dest pêkenî.”

‘MA BIBÎ MUSLUMAN, ŞER BIKERÎ Û ERD BIGÎRÎ’

Erenî qiseykerdişê xo de va ‘tirkî şerê Melazgirî sey şero ke bere Rojhelatê Mîyanênî înan rê abîyî, vînenî’ û wina domna: “O wext nê cayî destê Bîzansî de yî. Mîyanê tirkan de yê ke hakim î, bi fikrê ‘ma bibî musluman, şer bikerî û erd bigîrî’ hereket kerdêne. Çimkî cayê ke ameyî, yê kurdan, armenîyan û rûman bi. Xora îttîfaqo ke Şerê Melazgirî de yeno awan kerdene zî nîşaneyê ci yo. Çimkî tirkmenanê Alpaslanî ra hîna zafêr tirkmenî mîyanê artêşa Bîzansî de estî. Cok ra tirkî bi fikrê ‘ma bawer bikerî, bibî mumîn û wa îtîqatê ma bibo’ îslam qebul nêkerdî. Seba ke tayê çîyan bigîro, îslam qebul kerdo. No şexsîyetê Erdoganî de zî bi hawayo zelal yeno dîyayene.”

PRATÎKÊ SESERRÎ YÊ KEMALÎSTAN BINKEWT

Erenî bale ant rewşa çepgiranê tirkan ser û wina va: “Rojhelato Mîyanên de yê ke tewr zaf îslamî ra menfîet dîyî hakimê tirkan î. Merdim bi hawayo zaf rehet eşkeno vajo ke ereban ra dima yê tewr zaf îslamî bikar ardo, hakimê tirkan î. Mesela tîya de pratîkê seserrî yê Kemalîstan binkewt. Çimkî ê bi hawayo şaş nizdîyê îslamî bîyî. Çepgirê tirkî ke seba şarê xo canê xo danî, ewro şar destek nêdano înan. Welatê tirkmenan de partîyê nîjadperestî yê sey MHP û AKP hakim î. Çimkî çepgirê tirkî ruhê komelî nêzanî û nêşênî bibedilnî. Dîqet bikerê; ewro zî tirkî Sûrîye de, Îraq de yenî şer kerdene. Reyna seba Amerîka Afganîstan de, Somalî de û sewbîna cayan de şer kerdî. Netîce de grûbêk bîye dewlete.”

ÎSLAMÊ SÎYASÎ SER ÎMHAYA KURDAN DE AWAN BENO

Erenî qiseykerdişê xo de va ‘îqtîdar goreyê awanbîyayîşê komare, ewro hîna zaf texrîbatan keno’ û wina va: “Verê cû çi amebî kerdene, ewro hîna zaf yenî kerdene. Çimkî îqtîdar sey o wextî feqîr û newe nîyo. Goreyê ê wextî ewro hîna zaf îmkanî destê ci de estî. Awanbîyayîşê Kemalîzmî de Îttîhat Terakkî ganî xirîstîyanan orte ra biwedarnayêne ke bişînayêne nîjadperestîye bikero. Xrîstîyanî bi no hawa ameyî tasfîye kerdene. Ewro kam tehlukeyin o? Kurdî. Cok ra AKP îslamê sîyasî ser imhaya kurdan ra awan keno. Ez seba meşrûkerdişî nêvana. No îqtîdar o, faşîst o û wazeno xo bihêz bikero. Cok ra ganî tayênan tasfîye bikero û bikewo herinda ci. Ewro îslamcîtîya nîjadpereste ya tirkan demo vîyarte ra cîyayêr a. Çimkî muslumanan û kurdan ser ro ameya awan kerdene. Mesela ez nêvana dînperestîya Erbakanî de dişmentîya kurdan çin a, labelê zaf tehlukeyin nîya. Hetta vera kerdişanê dewlete de reaksîyon nîşan dayo, labelê eynî reaksîyon vera Îsraîlî de nîno nîşan dayene. Îslamcîtîya ewroyî dostê rojawanî yo.”

ERDOGAN VERA ÎSRAÎLÎ DE NÎYO

Erenî cewab da persê ‘çira îqtîdaro ewroyên dostê rojawanî yo?’ da û wina va: “Çimkî êdî rojawanî reyde karê xo qedênayo. Tena dişmenê ci kurdî yî û zafê kurdan zî musluman î. Heta ke kurdî nêrî tasfîye kerdene, rejîmê Erdogan û AKPyî nêşêno rehet hereket bikero. Îslamîstê tirkan heta 1800î yê ke musluman î, înan reyde pê kerdî. Sey nimune têkilîya dewleta Osmanî heta 1800î kurdan reyde baş a. Eyaletê Kurdîstanî estbi. Xeylê paşayê kurdan estbî. Mamostayê Fatîh Sultan Mehmedî û yê Yavuzî kurd î. Badê ke nîjadperestî kewtî îslamîstanê tirkan mîyan, êdî nîjadperestîya tirkan dişmenê îslamî ya. Ewro halê Sûrîye aseno; merdim hedîseyanê Sûrîye nêşêno tena ser dişmentîya kurdan ra biwano. Çimkî Neo-Osmanî çîyêko winasî yo ke çim dayo cografyaya îslamî. Çimkî nîjadperestîya tirkan îtîraf kerda ke vera rojawanî de binkewto. Eke merdim dîqet bikero, Erdogan vera Îsraîlî de nîyo. Tena ser ci ra propoganda keno. Bi no qeyde wazeno muslumanan qezenç bikero. Na îslamcîtîye dişmenê Rojhelatê Mîyanênî ya, dişmenê ereb, faris û kurdan a. Cîyayîya AKPyî bi nîjadperestanê bînan ra na ya.”