Vakurê Kurdistan û Tirkîye de bi îlankerdişê halê îstîsnayîyî binpaykerdişê heqan dilab-hîrlab zêdîya. Bi  se hezaran kesî ameyî îxraçkerdene û 102 şaredarîyî yê pabesteyê DBPyî ra 95 rê qeyûm ame tayînkerdene. Nînan ra yewe zî Şaredarîya Farqînî ya ke 2016 ra nata ci rê 3 qeyûmî ameyî tayînkerdene ya.

Farqîn de sey xeylî cayanê bînan ê Kurdistanî şar hemverê qeyûmî de bihêrs o. Raîfe Çelîka farqînije ard ziwan ke aye heme emrê xo Farqîn de ravêrno û heta ewro Farqîn wina xirab nêdîyo û wina dewam kerd: ‘‘Şaredarîya DBPyî şarî rê xizmet kerdêne la ma yew xeyrê qeyûmî nêdî. Varayîşî ra dima domanê ma rîyê çamûrî ra nêeşkenî vejîyê teber. Rayîrê dewan û merkezî xo ra nênî viraştene.  Farqîn de qeraqolî esenî sewbîna tiway çîn o. Ma semedê na tengayîye ra vejîyayîşî weçînitişî pawenê.‘‘

Hemwelatijêka bi nameyê Emîne zî nê vatî: ‘‘Hîrê rey qeyûm ame vurnayene la ez hema nêzana ke o kam o senîn o. Ez senî rey dana nînan?  Çîyê ke xora wazîfê înan ê bi pere kenî. Qet yew xizmetê înan şarî rê çîn o. Ma do hesabê nînan weçînitişî de bipersê.‘‘