Agît Uralî ra mektûbêk seba keynaya xo

Agît Uralo ke çalakwananê grevê vêşanîye yê bêdem û bêagêrayîşî yê Strasbourgî ra yo û no 69 rojî yo grevê vêşanîye de yo, mektûbêk keynaya xo Tamara rê nûşt. Uralî vat,"Keynaya mi ma do pîya rojanê azadan welatê azadî de, bi Rayberîya Azade dir biciwîyê.

Çalakwananê grevê vêşanîye yê bêdem û bêagêrayîşî yê Strasbourgî ra Agît Uralî keynaya xo Tamara rê mektûbêk nûşt û mektûbê xo de nê vatî:

"Delala mi Tamara! Ê rojê hewn û xeyalî nizd ê, dûr nêyê. A game ez do destê delala xo bigêrî û pîya ma do şirê welatê pî û bapîran, wareyê Mem û Zîne. Ûca ra zî şirê koyê bi derd û dejî, wareyê qehremanan koyê Gabar û Cûdî. Ma do pîya goş bidê vengê şalûl û bilbilan. Ê koyanê ke bi boya rîhan û babûnan pirî ya, ê newalan de û zozanan de ke bi vengê bilûrwanan pirî yê, ma do pîya bigêrê. Do derd û dejî dûrî de bimanê. Keynaya mi ma do pîya rojanê azadan welatê azadî de, bi Rayberîya Azade dir biciwîyê. Bi nê umîdî û bi ruhê xoverdayîşî ez to virare kena.

Mektûbo ke hetê çalakwanê grevê vêşanîye yê bêdem û bêagêrayîşî yê Strasbourgî Agît Uralî ra seba keynaya ci Tamara ameyo nûştene wina yo:

“Keynaya min a delale Tamara rê,

Silam delala mi Tamara. Seba ke ez hesret û kederê zerrîya xo bişiknî, dej û derdê zerrîya xo xovîr ra bikerî, senî bilbil seba ke gule kêfweş bikero bişewe û biroje bi vengê xo yê weşî waneno û ci rê şîîran vano, mi zî xo hadre kerd ke ez delala xo rê, çîyanê zerrîya xo vajî. Mi waşt ez delala xo dir pare bikerî ke dejê aye hîna tay cane mi bidejno. A game do herinda ê dej û vêşayîşî de eşq û hesreta delala mi bi ca bibo.

Erê xezala mi, dinya de êyê ke hîsê înan pak ê û bêgune yê doman ê. Zerrîya domanan de xirabî, kîn, nefret, dişmenî û kiştiş çinyo. Ez nêzana to ra senî vajî; na dinya û demo xirab roje bi roje a dinyaya şima wa weşe, hewn û xeyalanê şima herimnenê. Na leymîye roje bi roje umîdê şima yê cuye çinê kenê. La qe meraq meke delala mi, biewnî senî gul û babûn û rîhanê verê tîjîya rojî, awa zelale û vayê azadîye xurt benê, ma zî seba ke rojê şima weş û geş bibê, çi destê ma ra yeno ma do bikerê. Bi nê hawayî ma do ê hewn û xeyalanê şima bica biyarê. Û şima rê cuyêka bêşere û bê kiştişî awan bikerê.  

Erê xezala mi, her çende ez to ra dûrî bibî zî timî o rîyê to yo huyaye verê çimanê mi de yo. Ez umîd kena rîhuyayeya mi, o rîyê to yo delal xemgîn û biderd nêbeno. Her çende vewre û varan bivaro, her ca cemed bigîro, do germîya zerrîya şima kemî mebo û do nêtefîyo.

Erê xaseka mi, to maya xo ra persayo ke tirêm pîyê mi mi ra hes keno yan nê. Delala verê zerrîya mi ti ya, nê çirey xovîr ra mekere ke ti baxçeyê zerrîya mi de sey gule û rîhanî zergûn bîya û sey gule rîhanî bena pîl û reng dana. Key ke aciz bena û taqet ra kewena ti yena vîrê mi, seba mi ti bena umîd û derman. Her sanîye zerrîya mi bi to weş bena, bicoş bena.

Delala mi ti rind bizane, mi heskerdişê to zereyê zerrîya xo de ramito û bi ca kerdo. Dormeyê ê heskerdişî zî sey burc û sûranê Amedî berz kerdo. Ta ke çew nêeşko bikewo mabênê min û rindeka mi.

Şîrîna mi, heta ez dinya de bî ez to xovîr ra nêkena. Çunke to zerrîya mi bi eşqê xo xemilnayo. Sey ê neqşanê serê destê mayan, to zerrî û mezgê mi reng bi reng neqişnayo. O huyayîş û delalîya to sey fîlmêk her sanîye verê çimanê mi ra ravêrenê.

Erê borana mi, xovîrrakerdişê to asan nêyo û xora çîyêko winayên do qe nêbo. Ti zana dem xirab o û merdimê zalimî estê. Seba ke ê gul û babûne ke to zereyê baxçeyê zerrîya mi de ramitê nêçelmisîyê, ke domanê sey to bieşkê bêters biciwîyê, min û 13 embazanê xo xo seba şima kerd mertal. Sey çilayêka takewtîye, yan zî sey findêk ke saet bi saete, sanîye bi sanîye ma bedenê xo dayo verê vilêşnayîşî.

Erê qijkeka mi, seba ke no dejê zerrîya mi bişikîyo û zerrîya mi honik bibo, ti bibîyêne vayêko honik yan zî varanê wisarî ke erdê ziwayî ser o varena ke xo reyde hesreta erdê pîrozî bica ano, ti zî wina biameyêne mi hete ke mi zî ê dej û kederê zerrîya xo xovîr ra bikerdêne. Û sey verî ma pîya şa bibîyêne.

Xezala mi, ti nê çirey xovîr ra meke; ti zerrîya mi de sey vilika Lotose ya. Her çende a mîyanê awa lêle û lince de zergûn bena zî seba ke toxim û cewherê ci pak o, çirey toz nêgêna û nêbena gemare. Bişewe xo noqê awe kena û bi vejîyayîşê rojî sereyê xo binê awe ra vejena, weş û geş bena. Erê delala mi, seba ke ez gula zerrîya xo heme xerîbîyan ra bipawî , ti roje bi roje şax bidê û pîl bibê, sey notirwanêkê verê baxçeyî her tim bi germîya zerrîya xo to virare kena û sey şîîra welatê xo to wanena. Ta ke ti zî sey mi kêfweş û zerrşa bibê.

Delala mi Tamara! Ê rojê hewn û xeyalî nizd ê, dûr nêyê. A game ez do destê delala xo bigêrî û pîya ma do şirê welatê pî û bapîran, wareyê Mem û Zîne. Ûca ra zî şirê koyê bi derd û dejî, wareyê qehremanan koyê Gabar û Cûdî. Ma do pîya goş bidê vengê şalûl û bilbilan. Ê koyanê ke bi boya rîhan û babûnan pirî ya, ê newalan de û zozanan de ke bi vengê bilûrwanan pirî yê, ma do pîya bigêrê. Do derd û dejî dûrî de bimanê. Keynaya mi, ma do pîya rojanê azadan welatê azadî de, bi Rayberîya Azade dir biciwîyê. Bi nê umîdî û bi ruhê xoverdayîşî ez to virare kena.

Pîyê to Agît Ural”