AKPyî Şaredarîya Colemêrgî ya ke 11ê Êlule 2016 de xesp kerdebî rê Cuneyt Epcîmo ke hetkarê walî bi û sey qeyûm amebi tayînkerdene namzed ramot. Karo ewilên ê qeyûmî yo ke bi polîs û leşkeran dekewtibi banê şaredarîye aliqnayîşê beyraqa Tirkî bi.

Colemêrg bi qeyûmî hema hema bi bajarêko qedexekerde. Şaredarîya ke wextê DBPyî de deynê ci çinêbî mîyanê di serran de bi qeyûmî deynê ci resayî 500 mîlyon lîra. Awa tayê keyeyan bi îdîaya ke PKKyî yê yan zî paştî danê PKKyî amî birnayene, şarî rê awa kanalîasyonî yê eskerîye amî şirawitene.

POLÎTÎKAYA KOÇBERKERDIŞÎ AMÎ BICAARDENE

Colemêrgo ke qeyûmî ra ver bajar û qezayanê dormeyî ra koç girewtêne hendî teberî rê koç kerdêne. Dewlete polîtîkaya koçkerdişî sere de Colemêrg, bajaranê Kurdistanî de ancî bi hawayêkê hîna aktîfî viste dewre. Şarê Colemêrgî vanê ke bajarê înan tarîx de dewrê xo yê tewr xirabî ciwîyeno.

Cenazeya Mehmet Temelî yê 35 serrî ke hetê artêşa Tirkî ra dormeyê Kahnîyareş ke nizdê deweka Ezîzanê de amebi kiştene zî hetê walîtîya Colemêrgî, Cuneyt Epçîm û mudurîya asayîşî ya bajêrî ra amîbî astengkerdene.