Poîtîkaya şerî ya Serokkamarê tirkî Tayyîp Erdoganî ver Tirkîya û Vakûrê Kurdîstanî de krîzê ekonomîke çend şino xorî beno. Şar û esnafî zaf zorîye ancenî. Her roje zemî benî, vayî ver kes nêşkeno tiway bihêrîno. Xidayê esasî ke şar mecbur o bihêrîno, xeylê ci se ra 50 û se ra 100 zem bîyî. Zeman ver esnafî nêeşkenî tiway bîgîrî û şar zî nêeşkeno bihêrîne.

Sere de Colemêrg û bajaranê Kurdîstanî de yew ciwalê ardî 50î ra heta 120 TLyî zêdîya. Zemî ver xebatkarê firinan kêmî nan pewjenî. Xeylê firindan de seba ke malzemeyê înan çin o, roje de tena rayêk nan yeno pewtene. Senî ke ard vaye bi, nan zî se ra 20 zem bîyo.

POLÎTÎKAYA ŞERÎ YA AKPYÎ VER WELAT KEWTO KRÎZÎ MÎYAN

Şarê Colemêrgî vera polîtîkaya AKPyî de hêrsin o. Welatijan ard ziwan ke hukmat hetêk ra zem keno, heto bîn ra zî wareyan qedexe keno, destur nêdano ke şar bi citkarî û heywankarî îdareyê xo bikero.

Hemwelatîyo ke nêwaşt nameyê xo bido, wina va: "Colemêrg de ma êdî firinan û dikanan de nanî nêvînenî. Nano ke firinan de yeno pewtene, saetêk de qedîyeno. Eke wina dewam bikero peynîya welatî hol nêaseno."

Esnafan ra yew zî dîyar kerd ke bi ameyîşê krîzî her çî rê zem bi û wina va: "Bitaybetî zî ard zaf bîyo vaye. Coka firinan de sey verî nan nîno pewtene. Kam ke serê sibayî nan nêgiro, a roje nan nêvîneno. Krîzê ekonomîke ver şar zaf zorîye anceno. Demo nizdîye de şar do nêeşko nan peyda bikero."