Amed de kitabxaneyo kurdkî ame akerdene

Qezaya Sûrî ya Amedî de kitabxaneyo ke tede tenya kitabê kurdkî estê ame akerdene.

Nê wextî de ke seba fermîbîyayîşê kurdkî xeylî komxebatê ziwanî yenê kerdene û partîyanê Vakurê Kurdistanî platformê ziwanî awan kerdo, qezaya Sûrî ya Amedî de ciwanêkê kurdî seba xizmetê ziwanê maya xo kitabxaneyêk akerd.Kitabxaneyo ke mehlaya Zîya Gokalpî de bi nameyê “Kitabxaneyê Amedî” ameyo akerdene, tede tenya kitabê bi lehçeyanê dimilkî (kirmanckî) û kurmanckî yê kurdkî estê. 

BAZARO OTANTÎK Û GALERÎYA HUNERÎ

Îlyas Karagozî da zanayene ke ê 7 serrî verî Sûr de kargehêkê otantîkî akerdo û vat: “Domanîya xo ra ez ca û eseranê tarîxîyan rê û hunerî rê meraqdar a. Dima ke mi cayêk dî, mi zemînê xi kerd bazaro otantîk û qata serê ci zî açarna galerîya hunerî. Çend mengî verî ma qerar da ke galerîya xo ya hunerî rê kitabxaneyê kurdkî zî daxil bikerê.”

'MI KITABXANE HEMVERÊ ASÎMÎLASYONÎ DE AKERD'

Karagozî ard ziwan ke eleqedarîya ciwanan seba kitabxaneyî vêşî ya û wina vat: “Kurdistan û Tirkîye de mîyanê doman û ciwanan de asîmîlasyonêko pîl esto. Na yewe ra xusûsen seba doman û ciwanan kitabî kitabxaneyê ma de estê. Xizmetê seba kurdkî gureyê her kurdî yo, mi zî bi na berpirsîyarîye Amed de no kitabxane akerd.”

'MA ZIWANÊ XO RÊ WAYÎR VEJÎYÊ'

Cuma Karakoço ke roje de 4 saetanê xo kitabxaneyî de vîyarneno wina vat: “Hewna ke ez dewe de bîya înan mi rê tirkî mûsna, dima ra ez kurdkî mûsaya. Hemverê kurdan de polîtîkayê asîmîlasyonî dereceya tewr berze de yê. Ganî ciwanê kurdan hemverê nê asîmîlasyonî de bi kurdkî biwanê û binûsê. Gama ma ewnênê kuçeyan ra nisbetê qiseykerdişê kurdkî xeylî tay o. Sûr de Kitabxaneyê Amedî ke tede tenya kitabê kurdkî estê ameyo akerdene, no çîyêko zaf rind o.”