Meclîsê Gencan yê Partîya Demokratîke ya Şaran (HDP) do bi şîarê ‘ma xo rêxistine bikerê, azad bibê‘ 30ê êlule de Amed de konferansê herêmî virazo. Endamê Meclîsê Gencan yê HDPyî Ferat Dalkiranî ANFyî rê muhîmîya konferansî ser o qisey kerd û seba tewrbîyayîşî veng da.

RIXMÊ HEME HÊRIŞANÊ DEWLETE GENCÎ PAYRA YÎ

Dalkiranî vera polîtîkaya hêrişkare de diqet ant muhîmîya têkoşînê gencan ser û wina domna: “Hukmat bi hêriş, qetilkerdiş, ters û xofî wazeno ke şarî bêveng bikero. Dewro peyên de vera şaran de hêrişî zêdîyayî. Şar binê têser qeldiya û gencî zî binê bêveng mendî la no nîno manaya bêtesîrkerdişê gencan. Gencî her wext her qeyde xo ramojnenî. Newrozanê peyênan de seranserê bajaranê Kurdîstanî de gencan rixmê heme hêrîşan rayberîye kerd. Hem şarê ma hem zî dewlete no dîyî.”

VERA POLÎTÎKAYA ASÎMÎLASYONÎ DE RÊXISTINBÎYAYÎŞÊ GENCAN

Dalkiranî qiseykerdişê xo rê wina dewam kerd: “Ma xeylê bajaranê Kurdîstan û Tirkîya de kongre û kombîyayîşî viraştî û goreyê naye qerarê konferansî girewt. Gencî wazenê ke xo rêxistine bikerî. No zî bi qiseykerdiş, parekerdiş, persayîş û ameyîşê cayêk beno. Wezîfeyê ma waştişê gencan caardiş o. Hedefê ma de turnuvayê sporî, konferans û forum estî. Dewlete gencanê ma ser o kayanê lêşinan kay kena. Wazena ke hetê ehlaq û kulturî ra kurdan çin bikerî. Ganî ma bi têgerayîşê rêxistinên nê kayanê înan puç bivejê.”

VENGDAYÎŞÊ KONFERANSÎ

Dalkiranî seba tewrbîyayîşê konferansî veng da û wina va: ‘‘Ma peroyê şar û gencanê xo dawetê konferansî kenî. Tena bi gencanê rêxistinin ma eşkenê serbikewî. Wa gencê ma bêrî, ma qisey bikerê, kêmanîya xo bovine û pero pîya nînan çareser bikerê. O wext serkewtiş hîna beno nizdîye. Bê rêxistine kes nêşkeno payra bimano, enciqyeno û asîmîle beno. Bêrên ma hêzê xo yew bikerî û bi berzkerdişê têkoşînî serbikewî.”