Rojnameyî nûşt ke Teşkîlatê Îstîxbaratê Mîllî yê Tirkî (MÎT) Amedîye ya Duhokî ya Başûrê Kurdîstanî de 5 baregehê xo ardê ra.

Heman xebere de dîya zanayene ke nê baregehan de çekê giranî ameyî cakerdene û ame vatene  ke baregehê hawayî yê herême  zî seba bombardûmankerişê cayê gerîlayan yenî şuxulnayene.

BAREGEHÊ MÎTÎ YÊ AMEDÎYE

Goreyê xebere,  merkezanê MÎTî yê Amedîye ya pîya herêma sînorê Şêladizê de yew, Kanî Masîya de yew û Girê Bardozî de di  baregehê înan estî. Cayê teyaran ê Bamerne zî açarîyayo sey merkezê îstîxbaratî.  Çekê giranî sey tanq, top  hewanan a pîya wesayîtê zirxinin û helîkopterî zî tîya de yenê cakerdene.

Ame vatene ke teyareyê bêmerdimî yê hewayî û helîkopterî  yê dewleta tirkî zî cayê teyaran ê Bamerne ra wirzenî bobardûmanan kenî.

ŞARÊ HERÊME NÊREHET O

Derheqê babete de selahîyetdarê YNKyî yê herême ra Hawar Amêdî na xebere raşt kerde û va: ‘‘Rîyê nê merkezanê MÎTî ra şarê Amedîye rehet tênêgêreno. Şar vera naye reaksîon nîşan dano la ne hukmatê herême yê Kurdîstan ne zî îdarekarê Iraqî mesela çare nêkenî.

ESTBÎYAYÎŞÊ LEŞKERANÊ TIRKÎ Û HÊRIŞÊ ÎŞXALÎ

Xora yeno zaneyene ke dewleta tirkî bi des serran o bitaybetî zî bi pêkerdişê ke bi PDKyî viraştî, herra Başûrê Kurdîstanî de ya. Merkezê îstîxbaratî çîyêkê nimite nîyê la serranê peyênan de dewlata tirkî herême de estbîyayîşê xo hîna bihêzdar kerdo.

Dewleta tirkî 12ê temmuza 1991î ra nata bajaranê Dûhok, Zaxo, Hewlêr û Selahaddînî de xo cakerdo. Nê prossesî sey çîyêko ravêrtox dest pêkerd. Serra 1994 de bi pêkerdişê serekê PDKyî Mesût Barzanîyî û dewelta tirkî bîye mende û serra 1997î de bi pêkerdişo bîn Başûrê Kurdîstanî de estbîyayîşê leşkeranê tirkî biyo fermî.  Bi hezeran  leşker û îstîxbatkarî û bi seyan wesayîtê zirxinî herême de ameyî cakerdene.