Artêşa tirkî bi zûran wazena ke vîndîbîyayeyanê xo binimno

Fermandarîya Sewq-Îdare ya Wareyê Pawitişî yê Medya da zanayene ke artêşa tirkî ya îşxalkare seba ke vîndîbîyayeyanê xo yê giranan binimno serre dana xeberanê zûran ro. Waşt ke şar hemverê xeberanê zûran de haya bo.

Fermandarîya Sewq-Îdare ya Wareyê Pawitişî yê Medya  eşkerayîyêka nuştekîye daye û waşt ke şar wa hemverê xeberanê zûran yê medyaya tirkî de haya bo.

Fermendarî eşkerayîye de vat: “Hêrişê bitesîrî yê HPG/YJA STARî yê mabênê tarîxanê 9 û 10ê Teşrîna peyêne dewleta tirkî şok kerdê û bi nê şokî raşte raşt Wareyê Pawitişî yê Medya ser o hêrişê hewayîyî û hêrişê bi topan kerdê. Nê hêrişî bi rayîrê ‘medyaya hewûze’ bi hawayêkê bimubalexeyî rayapêroyîye rê yenê pêşkêşkerdene, îdîa kenê ke bi desan gerîlayî ameyê kiştene û bi nê xeberan rayapêroyîya Tirkîye û ya dinya ra raştîyan nimnenê. ”     

RAŞTÎYE DIR TU ELEQEDARÎYA ÎNAN ÇINYA

Eşkerayîye de bale ancîya nînan ser: “Ma wazenê bidê zanayene ke wexto ke qalê ci yeno kerdene de tu gerîlayêk ma şehîd nêkewto. Eksê nê de vîndîbîyayeyê vêşîyî yê artêşa tirkî ya îşxalkare virazîyayê.”

GANÎ HEMVERÊ XEBERANÊ ZÛRAN DE HAYÎDAR BIBÊ

Peynîya eşkerayîye de vajîya: “Zihnîyeto ke nê xeberan vila keno roja 9ê Teşrîna peyêne de dormeyê Awa Markî ke herêmêka tûrîstîke ya Başûrê Kurdistanî ya, ûca ser o bi wesayîtanê bêmerdiman ê hewayîyan şarê sivîlî ser o hêrişî viraştî. Ganî şarê ma yo welatperwer hemverê xeberanê zûran de hayîdar bibo.