Serragêrayîşê awanbîyayîşê PKKyî yo 40. Wareyê Pawitişî yê Medya de bi merasimêkê biheybetî ame pîrozkerdene.

Kîşta fermandaranê Qerargehê Merkezî yê Pawitişê Şarî ra Bahoz Erdal û Gulistan Gulhate de fermandaranê YJA Starî ra Jîndar Zagrose, Rêzan Amed û Ferzad Wan zî tewrê pîrozkerdişî bî. Qiseykerdişê endamê Fermandarîya Qerargehê Merkezî yê Pawitişê Şarî Bahoz Erdalî de nînan rê ca dîya:    

 ‘RIXMÊ HEME HÊRIŞAN DE PKK PAY RA YO’

Sere de ma serragêrayîşê partîya xo ro Rayber Apoyî, şarê Kurdistanî, şaranê herême û heme embazan pîroz kenê. Çewres serranê vîyareteyan de mucadeleyê PKKyî morê xo dayo tarîxê Kurdistan û herême ro. Herême de hema hema heme hêzan hêrişê ma kerd. Dewletê kolonyalîstan ê herême û hêzanê mîyanneteweyîyan xo mîyan de îtîfaq viraşt. Hemverê Rayberîya ma û şarê ma de komplo viraşte. Bi hezaran Kurd kiştişanê meçhulan de ame kiştene, 4 hezarî ra vêşêr dewî ameyî vêşnayene, vengkerdene. Rixmê nê heme hêrişan de zî partîya ma pay ra mende.

 ‘MUCADELEYO 40 SERRE BI ŞER Û XOVERDAYÎŞÎ VÎYART’

Çewres serrê ma bi temamî bi şer û xoverdayîş vîyartî. Tayê vanê ke ‘PKKyî se kerdo, heta ewro çi kewto dest?’ Ma zî vanê ke nê mucadeleyê çewres serrî de PKKyî se nêkerdo, çîyo ke nêkerdo mendo? Morê PKKyî kamcîn averşîyayîşê Kurdistan û Tirkîye de çinyo? Tenya hetê sîyasî û eskerîyî ran ê, hetê komelkî û fikirkîyî ra zî no wina yo. Eke înkarkerdox û nankor nêyê wa prosesê vernîya PKKyî û dimayê ci biyarê têver, do bivînê ke çi newetîyî û averşîyayîşî virazîyayê.

 ‘KOLONYALÎSTKARÎYA TIRKÎ ÇIQA PKKYÎ RA TERSENA RAŞTE DE YO’

Ewro kolonyalîstkarîya tirkî ya ke binê destê AKP û Erdoganî de ya dişmenîya xo ya hemverê şarê Kurdî û şaranê herême bi eşkerayî ramojnena. Erdogan şino kamca PKKyî ra behs keno. Îhtîmal esto ke hewnê xo de zî PKKyî vîneno. No ramojneno ke o çiqa PKKyî ra terseno. Hemverê şarê Kurdî de dişmenîya eşkeraye keno. Hîtler seba Yahudîyan çi bi, Erdogan zî seba Kurdan o yo. Çîyo ke Erdogan û AKP ewro Kurdistan de bica ano fikir û bicaardişê Hîtler û DAÎŞî yê. Wina dişmenê ma esto ke ne merdimîye ra, ne dîyalog ra ne zî sîyasetî ra fam keno. Çîyo tekane ke fam keno çinbîyayîşê Kurdan o.      

 ‘MUCADELEYÊ PKKYÎ DO AZADÎYE BIYARO’

Ganî no zaf rind bêro zanayene ke no zihnîyeto ke dişmenê merdimîye yo çiqa hêrişanê xo bikero zêde ma do zî xoverdayîş û qerardarîya xo hende bikerê zêde û do şerê ma hîna bibo pîl. Xoverdayîş û mucadeleyê PKKyî do do şaranê Kurdistan û Tirkîye rê azadîye biyaro.

‘GANÎ ÎRADEYÊ ŞARÊ KURDÎ RÊ HURMET BÊRO RAMOTENE’

Nê demê peyênî de îdareyê Amerîka rayberîya partîya ma ra hîrê embazê ma sey hedef ramotî. Ma ne dişmenê Amerîka ne zî yê şarê Amerîka yê. Heme kar û xebatê rayberîya ma û îdareyê partîya ma seba azadîya şarê ma bîya. Qerarê Amerîka netîceyê bazarîyanê sîyasîyan de gîrîyayo. PKK do nê qerarî qebûl nêkero. Zafaneyê şarê Kurdî hetê PKK, rayberîya PKKyî û îdareyê PKKyî de yo. Nê erdan ser o bi hawayêkê azadî ciwîyayîş heqê Kurdan o zî. Eke yeno waştene ke Rojakewtena mîyanêne de aşitî û îstîqrar virazîyo ganî şarê Kurdî bêro naskerdene û îdareyê ci rê hurmet bêro ramotene.   

 ‘MÎLÎTAN Û HEMRAYÊ RAYBER APOYÎ BÎYAYÎŞ RÛMETÊKO PÎL O’

Tarîxo çewres serre yê PKKyî bi namdarî û şerefî dekerde yo. 40 serrî hemverê kolonyalîzmî de û heme tewir xirabîyan de bi şerkerdiş vîyartî. Ewro zî hêzê ke îradeyê partîya ma rê tehemul nêkenê hêrişanê xo domnenê. Ganî bi na hişmendîye ma mucadeleyê xo hîna xurt bikerê. Ma seba ke gerîlayê Kurdistanî yê mensûbê PKKyî yê xeylî şa û birûmet ê. Ma peyrewê Mazlûm Dogan, Kemal Pîr, Egît û Zîlanan ê. Ma rê rûmetêk o xeylî pîl o ke ma mîlîtan û hemrayê Rayber Apoyî yê. Bi na kêfweşî û hîsan ma serragêrayîşê 40. yê partîya xo pîroz kenê. Ma Rayberîya xo rê silam şirawenê û soz danê şehîdanê xo ke ma do tim hemra û peyrewê înan bê. Nê bingeyî de ma ancî serragêrayîşê 40. yê partîya xo ro heme hemreyanê xo pîroz kenê û vanê “Bijî Serok Apo!”