Endamê Fermandarîya Qerergahî yê Merkezê HPGyî Bahoz Erdalî programo taybet ê Stêrk TV de şerrê dewleta tirkî yê Kurdîstanî ercna.

Bahoz Erdalî bale ante xoverdayîşê gerîlayê Kurdîstanî ser û va: ‘‘ Semedê gerîlayî şerr çîyeko newe nîyo. 35 serrî yo gerîla hemverê dewleta tirkî de şerr keno. Coka ra gerîla dewleta tirkî hol şinasneno. Gerîlayê Kurdîstanî wayîrê tecrubeyêkê girdî yo û serkewtişê girdî vîstî dest.''

Qiseykerdişê Erdalî ra tayî cayî wina yê:

‘‘Şerrê mabênê gerîla û dewleta tirkî heta serra 2014î  bikontrol bi. La 2015î ra dima rayberîya Erdoganî de dewleta tirkî dest kerd şerrê topyekûnî. Dewleta tirkî nêverdena şarê kurdî û muxalifî nefes bigêrî. No  haqîqetêk o. Naye tena ma nêvanî.  Ewro bi seyan rojnameger, roşnîvîr û merdimê demokratî Tirkîya ra remayî. La ma naye vajî; raştî de ewro dewleta  tirkî heme hêzê xo vera gerîlayî şuxulnena.

Hesabekê Erdoganî  wina estbi;  di serran ê peyênan de Vakur de tasfîyekerdişê gerîlayî û dima zî Başûr de bi paştdayîşê sîyasetmedaran  şorişê Rojawanî tasfîyekerdiş. Erdoganî waştêne ke wina xo qezenckerde ramojno û Rojhelatê Mîyanênî de rolêk bigero û çîyekê hîna zafî biwazo. La şarê ma rixmê heme hêrişan destûrê naye nêda. Şarê Kurdî vat ke‘ ‘ Ti eşkenî ma bierzî zindanan, dew û bajaranê ma biveşnî la ti qet nêeşkenî îradeyê ma teslîm bîgêrî.‘‘ Heto bîn ra zî xoverdayîşê gerîlayan heme planê leyşînî yê dewleta tirkî pûç vetî. Nê semedî ra Erdogan hemverê şarê kurdî de wina bîyo hêrişkar.

ERDOGAN HER ROJ PEYSER GAME ERZENO

Rîyê şerrê Erdoganî ra ewro krîzo ekonomîk esto. Her roj bi desan teyerayî wirzenî.  Wiriştişê teyerayêkî de se hezaran dolarî şinî. Masrafo pîl şerrî rê yeno kerdene. Reyna rîyê şerrî ra Kurdîstan de zî haywantîye qedîyaya. Xora citkarî û tîcaret de çîyêk nêmend. Ekonomîya Tirkîya xeyrê berardişê Kurdîstanî payra bî. La nika nê zî nêmendî. Coka ra sebebê  îflasê ekonomî vînîkerdişê AKPyî yê şerrî yo.

Erdogan derheqê polîtîkaya Sûrîye de zî her roje peyser game erzeno û teslîmê Rûsya beno ke no tewr peynî de meseleyê Îdlibî de zî ame vînayene. Xora Iraq de zî sey verî rolê înan nêmendo. Sebebê nê hemeyan şerrê gerîlayî de vînîkerdişê înan o. Bêşik o ke şerro ke Kurdîstanî de yeno kerdene şerrêko  normal û rehet nîyo.

MEWZÎYA TEWR ZORE DE RAYBER APO ŞERR KENO

Xora hêrişo tewr gird Raber Apoyî ser o kenî. Na mehne de mewzîya tewr zore de Rayberê ma xover dano. Gerîla de tifing esto û koyanê Kurdîstanî de azad o. Gerîla bi şarê xo ya  yeno têhet û vera dişmenî şerr keno. La Rayber Apo tena vera terorê dewlete mucadeleyo tarîxî dano. Bi sebebê nê vindetişê erjayeyî yê Rayber Apoyî tecrîd xorî kenî. La ê se kenê wa bikerî gerîla û şarê ma xeta Rayberê xo de mucadeleyî xurt kenî.

HER KES GANÎ CAYÊ XO DE MUCADELE BIKERO

Şarê ma ra  ez eşkena  naye vajî; her kes cayo ke tede yo eşkeno mucadele bikero. Kam çi dest ra yeno ganî bikero. Tena wina bi mucadeleyî ma eşkenî wayîr ro xeta Rayberê xo bivejî. Her çî yewbînan rê pabeste yo. Eke ma wazenê tecrîdê serê Raybertîyê wedarê  tena bi waştişî nêbeno. Bi çalakîyan beno.  vera dişmenî çîyek ke ma vînî bikerê nêmendo. Herr û welatê to îxşal kerdo, hetê ekonomî ra xora to vêşan verdayo. Xora tarîx, ziwan, kultur û nasnameyê to gerîyayî binê lingan . O wext ti çînayî ra tersenî? Ganî keso ke vano ez welatperwer a mucadele bido.

CIWANÊ KURDAN WA KOLTETÎYE RA RÎYÊ  XO AÇARNÎ AZADÎYE

Ê bi rijnayîşê dew û bajaranê kurdan tena vera tarîxî de barê xo giran kenî. Dewleta tirkî bi nê hêrişanê faşîzanî nêeşkena îradeyê kurdan teslîm bigêro.  Şarê ma heta ewro zaf fedakarîye kerda la  ewro ra tepîya dilab-hîrlabê nayê lazim o. Ma wazenê bi rûmet, ziwan û kulturê xo ya bicuyê. Semedê naye ganî ma sermîyanîye bigêrê. Ciwanê kurdan ke raştê hêrişê fizîkî û kulturî yenî ganî vera  koletîye de milê xo çewt mekerî. Ewro ê  mezelê kurdan zî qebûl nêkenî. Vera naye ti senî vindenê? Çimanê xo a bikere çok mede verê xo bide koyanê azadîye.

ŞARÊ MA BÊ ALTERNATÎF NÎYO

Qet yew wextê tarîxî de şerrî rehet nêbîyî. Heme şerrî zehmet î. Çi heyf o ke şerr de merg esto.  Dişmenî nê şerrî rê ma mecbûr verdayî.  Va ‘‘ Şima ya benî koleyê mi ya zî  mirenî‘‘ rayîro hîrêyên  çîn o. Ma zî dişmenî ra naye vanî. Ma ne koletîye qebûl kenî ne zî ma sey verî bêhêz ê. Ti eşkenî ma ra tayan bimirênî. La bedelê naye ti do giran bidî.  Ewro hêzê şarê ma esto. Xora adresê ciwanan eşkera yo. Wa heme şarê kurdî hola bizano ke dewleta tirkî dişmen a û wazena ke kurdan biqedîno. Dewleta tirkî  bi qetlîam û qirkerdişê kulturî wazena kurdan çîn bikero. Şarê kurdî dewleta tirkî rê mecbûr nîyo. Şarê ma bê alternatîf nîyo.  Şarê kurdî ganî ruh û mezgê xo de zihnîyetê tirkan ra xo raqilino û azad bicuyo.‘‘