Hayîdarîyanê HPGyî ra gore nê çalakîyan de tewr tay 9 leşkerê tirkî ameyî kiştene. Hetêna ra Merkezê Çapemenî û Îrtîbatî yê HPGyî eşkerayîya xo ya derheqê gerîla Naîm Turkozî de kerdebî zî sereraşt kerde û ard ziwan ke Turkoz esîr kewto.

 Hayîdarîyê ke eşkerayîye de yê wina yê:

ÇALAKÎYANÊ BARZANÎ DE TEWR TAY 5 LEŞKERÎ AMEYÎ KIŞTENE

 „Çarçiwaya Hemleya Şorişgêre ya Şehîd Pîroze û Şehîd Agirî de hêzanê ma roja 21ê Teşrîna verêne de hemverê artêşa tirkî ya îşxalkare de çalakîyî viraştî. Detayê çalakîyan wina yê:

Hêzanê ma herêma Barzanî ke keweno erdê Başûrê Kurdistanî saet 06.30 de Qilê Beyraqe ser o çalakîyêka suyîqestî viraşte û 1 leşker ame kiştene.

Hêzanê ma saet 10.30 de ancî hemverê îşxalkaranê ke Qilê Tepê ya herêma Barzanî de bica bîbî çalakîyêk viraşte. Mewzîyê dişmenî biîsabet ameyî panayene, 4 leşkerî ameyî kiştene.    

Hêzanê ma saet 15.50 de hemverÊ artêşa tirkî ya îşxalkare de ke Qilê Lêlîkanî yê pabesteyê Sîdekanî ke keweno erdê Başûrê Kurdistanî de bica bîbî çalakîyêk viraşte. Mewzîyê dişmenî û stargeyê înan gîrîyayî binê gulevaranêkê kesifî hûmara leşkeranê merde û birîndaran nêamî tespîtkerdene.    

Çalakîyan ra dima artêşa tirkî ya îşxalkare wareyê dormeyî bi obus û topanê hewanî raşte raşt bombe kerdî.

ŞIRNEX QILABAN: QÛLEYO ESKERÎ AME ÎMHAKERDENE

Roja 21ê Teşrîna verêne saet 11.45 de hemverê yewîyanê dişmenî yê ke Qilê Meymûne ya Qilebanê Şirnexî de bica bîbî çalakîyêk amî viraştene. Na çalakî de 1 konteyner û qûleyêko pîl bi temamî ameyî îmhakerdene. Hûmara leşkeranê merde û birîndaran tesbît nêbî.   

SÊRTÎ DE QOLÊ OPERASYONÎ AME PANAYENE: 4 KIŞTEYÎ

Roja 18ê Teşrîna verêne artêşa TCyî ya îşxalkare wareyanê Şehîd Berxwedan, Şehîd Canxurt, Korîdora Sorîyan, Derîyê Egîdan, Derîyê Çeperê û Destegorî yê pabesteyê Herekola Sêrtî de operasyonêko xeylî hîra ke tede têgêrayoxkarê taybetî, qorucî û kontrayî zî estbî da destpêkerdene. Roja 20ê Teşrîna verêne de hêzanê ma çarçiwaya Hemleya Şorişgêre ya Şehîd Delal Amed û Şehîdanê Besta de di qolan ra hêrişê yewîyanê dişmenî kerd, 4 leşkerê dişmenî kişîyayî. Wextêko kilm dimayê çalakîye ra hêzê dişmenî yê operasyonî bê ke netîceyêk bigîrê xo antî.  

BESTA DE YEWÎYA NIMITÎ AMÎ PANAYENE

Hêzanê ma çarçiwaya Hemleya Şorişgêre ya Şehîd Delal Amed û Şehîdanê Besta de, roja 21ê Teşrîna verêne saetanê şandî de wareyê Îkîzce yo ke mabênê Şirnex û Cizîre de maneno de yewîyê nimiteyî hedef girewtî. Na çalakîya ke hêzê dişmenî gîrîya binê gulevaranêkê kesifî hûmara leşkeranê merde û birîndaran tesbît nêbî.

DERHEQÊ GERÎLA NAÎM TURKOZÎ DE SERERAŞTKERDIŞ

Eşkerayîya ma ya bi tarîxê 26ê Tebaxî 2018î de ma vatibi ke artêşa tirtkî ya îşxalkare gama 21ê Tebaxî de dewa Lisek a Elbakê Wanî de operasyon viraşt embazê ma Andok (Naîm Turkoz) hêzanê dişmenî rê teslîm bîyo. Dimayê tehqîqat û cigêrayîşan ra ame zanayene ke embazê ma Andok teslîm nêbîyo, rîyê halo ke tede bîyo ra esîr kewto destê dişmenî. Ma a hayîdarîya verî sereraşt kenê, şarê xo yê eleqedarî dir pare kenê.“