Başûrê Kurdistanî de hetê keye, komel û îqtîdarî ra heqê cinîyan yenî binlingkerdene. 29ê Teşrîna peyêne de vera Merkezê Mucadeleyî yê Hemverê Şidetê Serê Cinîyan hêrişo bisîleh ame viraştene.

QETILKERDIŞÊ CINÎYAN

Başûrê Kurdistanî de 10 menganê serra 2018î de 104 cinîyî ameyî qetilkerdene ya zî xo kişt. Heman wextî de 224 qewimîyayîşê vêşnayîşê cinîyan ya zî xo venînayîşî bîyî. Hetê cinîyan ra 8 hezar û 141 dewayî ameyî akerdene.

DOMANÊ XEBATKARÎ

Bi hezaran tenî ke Rojawan û Sûrîye ra mecbûr mendî û Başûrê Kurdistan û Iraqî rê bar kerdî, ê zî tîya de tengayî ancenî. Domanî şertanê zehmetan de ciwîyenî. Goreyê anketê Rêxistina Pawitişê Domanan a Kurdistanî tena serra 2018î de Silêmanîye de 384 xebatkarê domanî estî. Zafê nînan zî ê ke keyeyanê înan bar kerdo ê yê.

ZEXTÊ SÎYASÎYÎ

Weçînitişê peyênî yê Herêma Kurdistanî ke 30 Êlule ya 2018î ameyî viraştene de Tevgera Azadî rê astengîye ameye vetene. Hukmatî destûr nêda ke Tevgera Azadî tewrê weçînitişî bibo. Hukmatê Iraqî Tevgera Azadî fermî qebûl keno la rixmê naye ameye astengkerdene. Tevgera Azadî hemverê heme zextan de tewrê weçînitişê parlamento yê 12ê Gulane ya 2018î bî. Hukmatê Herêma Kurdistanî waştişê fermîbîyayîşê Tevgera Azadî qebûl nêkerd û ofîsê ci qefilnayî.

Başûrê Kurdistanî de demo peyên de xeylî rojnamegerî ameyî qetilkerdene. Hukmat derheqê qetilkaran de cipersayîş nêda destpêkerdene û qetilkarî nêtepiştî. Goreyê doneyanê Merkezê Pawitişê Heqanê Rojnamegeran (Metro) serra 2018î de 250 binlinkerdişê heqanê rojnamegeran ameyî ciwîyayene.