Bayik: PKK, ruhê Kurdan o

Hemserekê Konseya Rayberdişî ya KCKyî Cemîl Bayikî vat PKK mîyanê cimatê Kurdan de mehêyayo; bîyo ruh, mezg û ameyoxê înan û wina vat: “Şima nêeşkenê tasfîye bikerê, PKK hendî têgêrayîşêk nêyo, şar o.”

Hemserekê Konseya Rayberdişî Cemîl Bayik tewrê programê taybetî yê “Ulkeden” yê Medya Haber TVyî bi û cewabê persanê rojnameger Esra Mîkyaze dayî.   

Cemîl Bayikî bale ante nînan: “Hendî şarê Kurdî nînan zaf rind fam keno; cuyêka bêazadî yan cuyêka bi bindestî qebûl nêkeno. Dewro verî hetê Kurdan ra ameyo ravêrtene. Ganî her kes nê fam bikero.”

ŞIKIYAYÎŞÊ ÎDRAKANÊ TARÎXKÎYAN

Bayikî wina qisey kerd: “Eke şarê Kurdî bi ruhê azadîye xo bihêz nêkerdêne dewamkerdişê mucadeleyê azadîye do zehmet bîyêne. Eke şima wazenê Kurdistan de yewîya komelê Kurdî awan bikerê ganî şima bizanê ke hemverê şima de sîstemo kapîtalîst o modernîst, dewletê Rojakewtena mîyanêne, hêzê kolonyalîstî û heta Kurdê hemkarîperwerî estê.

Têgêrayîşê ke tarîxê Kurdistanî de vejîyayê wextêkê kilmî de ameyê tasfîyekerdene, dimayê her tasfîyeyî ra zî cimatê Kurdan de şikiyayîşî virazîyayê û dormeyanê ke waştêne Kurdan qir bikerê bawer kerdêne ke ê do bieşkê bi ser bikewê. Ganî nê îdrakî heme biameyêne şikitene. Tarîxî ra nê dersî biameyêne vetene, cimatê Kurdan xo organîze bikerdêne û mucadele bidayêne.”

ÇÎYO KE OCALANÎ KERD

Bayikî vat ke Ocalan eşkayo nê îdrakanê tarîxkîyan bişikno û wina qisey kerd: “Bi nê hawayî dormeyanê ke vatêne Kurdî hendî nêeşkenê sere wedarê hemverê xo de Kurdêk ke her şertî de seba azadîya xo mucadele dano dî. Hendî felsefeyê mergî qebûl nêkeno. A felsefeye ra  felsefeya cuye vejeno meydan. Hem seba xo hem zî seba heme şaranê bindestan mucadele dano. Înan ke no dî hêrişê xo kerdî vêşî, la înan çiqa hêrişê xo kerdî vêşî xoverdayîş zî hende bi xurt û şarê Kurdî zaf qezenc kerd. Înan 2003 de waşt komplo bikirişnê heta mîyanê organîzasyonî, dima ke nêeşkayî waşt ke organîzasyonî perçe bikerê, vila bikerê. Nînan zî netîce nêda. Ewro têgêrayîş tenya Kurdistan de nê Rojakewtena mîyanêne de zî bi vila.”

PKK RUH Û MEZGÊ KURDAN O

Bayikî bale ante ke aktoranê komplo nêvindertê û bale ante qerarê tepiştişê 3 kadroyanê serkêşan ê PKKyî ke o zî tede yo û nê vatî: “Wazenê ke averşîyayîşê têgêrayîşî vindarnê. Senî ke înan komploya mîyanneteweyîye de û 2003 de netîce nêgirewt do nika zî nêgîrê. Hendî şarê Kurdî sey verî nêyo, seba azadîya xo her şetî de mucadele dano. PKK mîyanê cimatê Kurdan de mehêyayo; bîyo ruh, mezg û ameyoxê înan. PKK hendî têgêrayîşêk nêyo, şarêk o.

Çi êyê ke qaşo xo ra vanê ma dostê Kurdn ê û çi zî êyê ke hemverê PKKyî de dişmenî kenê û komployan virazenê serê PKK û rayber Apoyî ra sîyaset kenê. Eke wina nêkerê vêşan manenê. No zî ramojneno ke rayber Apo û PKK çiqa bîyê pîl. Eke rayber Apo û PKKyî ruhê azadîya Kurdan aver nêberdêne, cimatê azadî xo rê amac nêkerdêne û nê şaranê bînan mîyan de zî vila nêkerdêne her halî de do qerarê winayênî seba rayber Apo û PKKyî nêameyênegirewtene. Na raştî her Kurd, her roşinvîrê Kurdan heta merdimê ke dinya de mucadeleyê azadîye û demokrasî danê vînenê.”