Artêşa tirkî hetêk ra vera Vakur û Başûrê Kurdîstanî de operasyonanê leşkerîyan virazena û heto bîn de zî daristananê Kurdîstanî veşnena. Na çarçewa de Şirnex, Dêrsim û Bedlîs de şewatê daristanan dewam kenî û destûr nêdîyeno ke şar şewatan hewna bikero. Parlamentera HDPyî ya Şirnexî Nuran Îmîre wina va: “Vera tebîetê ma de bi zanayîş qirkerdiş yeno kerdene. Şewatî û astengkerdişê hewnakerdişî zî cok ra yenî kerdene.”

Demêko derg o ke koyanê Kurdîstanî de veşayîşê daristanan dewam keno û heta nika bi hezaran dolimî daristanî veşayî. Şewato ke Koyê Cûdî de vejîyayo, her ke şono hîra beno û destûr nêdîyeno ekîbê hewnakerdişî şêrî herême. Parlamentera Partîya Demokratîke ya Şaran (HDP) Nuran Îmîre babete ser o ANFyî rê qisey kerde. Îmîre va ‘şewatê daristanan parçeyê konseptê şerî yo’ û wina domnaye: “Badê ke AKP maseya çareserîye qelibna, hêrişê fikir, cuye, keye û nasnameyê kurdan keno.”

BÊVENGÎ FELAKETE YA

Îmîre qiseykerdişê xo de bale ante bêvengîye ser û wina va: “Vera nê wehşetî de bêveng mendene felakete û merg o. Çîyê ke vera tebîetê Kurdîstanî de yenî kerdene, zîhnîyetê AKPyî nîşan danî. No zîhnîyet, par ra nata goristanan bombe keno. Ganî şikê ti kesî no het de çinêbo. Kurdîstan xeylê hetan ra binê dagîrkerîye de yo û wazenî Kurdîstanî bixeneqnî. Ganî vera na rewşe de hem hetê neteweyî û hem zî hetê mîyanneteweyî de hesasîyet bivirazîyo. Ganî ma na dirîtîye teşhîr bikerî û no wezîfeyêko muhîm o.”

MUXATAB ÇIN O

Îmîre va ‘ma çend rojî verê seba ke cewab bidî, pêşnîyazê persî da Meclîs’ û wina domnaye: “Seba ke ma çend mefhûmî bikar ardbî, persanê ma tepîya erşawitî ma rê. Wexto ke bajaranê tirkan de şewat vejîyeno, sey xebera esasî yena dayene. Labelê wexto ke Kurdîstan de ma muxatab nêvînenî. Çiqas nebat, heywan û gandarî estî, mirenî. Şewatî benî sebebê koçkerdişan. Ma do reaksîyonanê xo rasteyan de nîşan bidî.”