Amed de binê nezaretê dewleta Tirkî de tîryak roşîyeno û fuhûş yeno kerdene. Mehlaya Huzuervlerî ya Kayapinarî de bîyayîşê 400 keyeyanê fuhûşî wehametê tablo ramojneno. Sere de qezayê Sûrî, qezayê Baxlar, Kayapinar û Yenîşehîrî yê Amedî binê zextê polîtîkaya şerê taybetî de yê. Mehlayanê Alî Paşa, Îskender Paşa, Azîzoglu û Îsmet Paşa yê Amedî de rotişê tîryakî û fuhûş hendî bîyê çîyê aleladeyî.

VERNÎYA ASAYÎŞÎ DE FUHÛŞ

Mehlayijî persenê çira rixmê her şewe dewrîyeya Têgêrayîşê Taybetî yê Polîsan (POH) de tîryak û fuhûş nêbeno kemî. Otela Şenolî ke kuçeyê hemverê Mudurîya Asayîşî ya Bajarî ya serê Cadeyê Gazî yê Sûrî de ya seba fuhûşî yena xebetnayene. Mehlaya Îskender Paşayî de zî kesê ke înan ra tewrikkar „torbacı“ yeno vatene eşkera eşkera tîryak roşenê.

Semtê Ofîsî de fuhûş keyeyanê apartan ê ke rojane yenê demankerdene de yeno kerdene. Nê keyeyî zî qaşo kontrolê polîsan ra vêrenê. Qezayanê Baxlar û Erxenî de zî nê serranê peyênan de rotişê tîryakî û fuhûş werişto dereceya tewr core.    

POLÎSÎ BI NÊ HALÎ XEYLÎ KÊFWEŞ Ê

Cinîyêka mehlayije nê vatî: “Nê 3 serranê peyênan de tîya çende şino beno xira. Serê goşeyan bi sûtanê ke tîryak roşenê bîyê pir. Polîsî hema hema her şewe vejênê dewrîye, rotoxanê tîryakî dir qisey kenê û şinê. Verî qe mebo nê sûtî partî ra û ciwananê partîye ra tersayêne. Ê ciwanî nika çinyê. Derdêkê nê sûtan zî polîsî dir çinyo.”

Kafeyê bi nameyê Hayal Kahvesî yo ke serê rayîrê „75 Metrelik Yol“î de yo tîryak roşîyeno û fuhûş yeno kerdene. Hemwelatijêk ke nêwaşt nameyê xo bido vat her şewe verê kafeyî de cinîyê ke sey bendeyê seksî yenê xebetnayene raştê meruzê şdietê camêrdan yenê. Semtê Huzurevlerî yê bajarî de zî hal bi heman hawayî yo. Esnafêk ke nêwaşt nameyê xo bido vat: “Ma zanê ke tenya na mehla de 400 keyeyê fuhûşî estê. Ma şîyî qereqolî û gerreyê nê keyeyan kerd. Her roje wesayîtê polîsan ê fermîyî gêrenê. Wina aseno ke polîs nê halî ra xeylî kêfweş o.” 

SERRÊ FUHÛŞÎ KEWTO HETA 16

Keyeyêk ke newe mehlaya Kaynartepe ya Baxlarî ra bar kerdo zî vat dimayo ke meclîsê mehla yê partî girîya tîryak û fuhûş hîna bi zêde. Ma bi serran a mehla de ciwîyayî. Çend problemî estbî la hende vila nêbî. Verî ê ciwananê partîye ra tersayêne. La dewlete ê ciwanî ya tepiştî yan zî qetil kerdî. Nika her ca de sûtî bîyê pir.

Qezaya Erxenî ya Amedî de zî tîryak û fuhûş resayo dereceya tewr core. Cinîyê ke şerê Sûrîyeyî ra remayê vernî de klubanê sey Yakamoz û Maşîrî yê merkezê Amedî de dima ra zî Erxenî de yenê eciqnayene. 150 metre averê nê kluban de nuqteya polîsî û eskerîye esta. Serrê nê cinîyanê ke yenê xebetnayene zî mabênê 16-30 de yo.