Meclîsê Ciwanan ê HDPyî hadreyîyanê Kongreya xo ya Aleladeye ya 2. ke do bi şîarê “Organîze bibe, Azad bibe û Kolonyalîzmî perçe bike” roja 25ê Teşrîna peyêne Amed de bêro viraştene domnenê. Endama Meclîsanê Ciwanan ê HDPyî Sevim Akdaga derheqê kongre de ANFyî rê qisey kerd.

OHALÎ RA DIMA ZEXTÎ VEJÎYAYÎ DERECEYA TEWR BERZE

Akdage vat ciwanê kurdan zextanê dewlete rê bîyanî nêyê û wina vat: “Serranê 80an ra nata serê ciwananê kurdan de polîtîkayê pasîfkerdişî ameyêne ferzkerdene. Bi prosesê OHALî yê peyênî zextî vejîyayî dereceyêka tewr berze.

Xeylî bajar û qezayanê Kurdistanî de xoverdayîşî virazîyayî. Nê xoverdayîşî zafane hetê ciwanan ra ameyî viraştene. Wina wextêk ame ke gama di ciwanî kuçe de ameyêne têhet înan mudaxeleyê ê ciwanan kerdêne.”

'KEMALAN RA HETA SAKÎNEYAN MÎRASÊ XOVERDAYÎŞÎ'

Akdage vat: “Verî zî ciwanî prosesanê vinderteyan ra ravêrtî. La netîce de ciwanê kurdan mîrasê xo yê xoverdayîşî Kemalan, Hayrîyan û Sakîneyan ra gênê. Bi weçînitişanê pêroyîyan Kurdistan û Tirkîye de lebatdarîyêk virazîyaye. Her cayo ke ma şîyêne şarê ma seke paweyê ma bi ma rê nizd bîyêne.”

HÊRIŞÊ ASÎMÎLASYON Û PUYAYÎŞÎ

Akdage qalê zext û zordarîyanê serê ciwanan zî kerd û vat: “Nê prosesî de xeylî tepiştişî û şehadetî virazîyayî. Embazê ma yê ke her game ameyêne remnayene û ajantîye înan ser o ameyêne ferzkerdene estbî. Senî ke nê zextî xo tekrar kenê tradîsyonê xoverdayîşî yê ciwanan zî xo tekrar keno. Şarê ma de zî paştîdayîşê nê xoverdayîşî estbi û ciwanan zî rolo ke kewtêne milê înan ser kay kerd.” 

MUCADELEYÊ CINÎYANÊ CIWANAN Ê NASNAMEYÎ

Akdage ard ziwan ke ciwanî hêzê dînamîkî yê cimatî yê û na yewe ra raştê polîtîkayanê leyminan ê sîstemî yenê. Dewamê qiseykerdişê xo de wina vat: “Sîstem bi polîtîkayanê xo serê ciwanan de kay keno. Gama ma ewnênê halê ewroyênî ra halêk ke wazeno ciwanan bipoyno û kulturê ci ra dûr bifîno esto.

Wexto ke ma xebatanê kîtle kenê şar ano ziwan ke fuhûş û tîryak bîyo vila. Xusûsen cinîyê ciwanî hemverê sîstemî de seba pawitişê nasnameyê xo mucadele danê. Amacê ma zî nê mucadeleyî hîna berzkerdiş o.”

SEBA KONGRE VENGDAYÎŞ

Akdage qiseykerdişê xo wina qedêna: “Herêma Marmara ra heta herêma Sehedî xebatê ma dewam kenê. Xora Meclîsê Ciwanan ê HDPyî xeylî yewîyan ra yenê pê. Kîşta çar perçeyê Kurdistanî û Tirkîye de Ewropa ra zî organîzasyonê ciwanan ameyî dawetkerdene. Sere de cinîyan ê ciwanan ma veng danê her kesî ke tewrê na kongre bibê.”