Bi hezaran ciwananê ke Têkoşînê Azadîya Kurdan de ca girewtî, bi xoverdayîşê xo koyanê Kurdîstanî de mîrasêk verdayo. Nê ciwanan ra yew zî Cesûr Gever (Bayram Ercîk) o. Gerîla Cesûr Gever serra 1992î de Colemêrg de yeno dinya û 2010 de zî beşdarê gerîla beno. Nizdîyê 4 serrî Warê Pawitişê Medya de maneno û 2014 de vera xo dano koyanê Botanî. Gerîla Cesûr 25ê êlula 2015î de Hemleya Şorişgêrî ya Elkê de şehîd beno.

Gerîla Cesûr, hîna şenikîya xo de rayîrê koyan museno. Çimkî o Zagrosan de ameyo dinya û heta wendişê lîse rayîrê koyan ra şono û yeno. Cesûr 2010 de sey ciwananê bînan keweno pey xeyalanê xo û beşdarê gerîla beno. Seba ke hîna zaf bigêro û xo aver bîşêro, 2014 de vera xo dano warê Vakurî.

HER KERRAYA KE MI EŞTÊNE, RAYÎRÊ MI DÎYAR KERDÊNE

Cesûrî derbazbîyayîşê xo yê warê Vakurî ra ver roportajêk dano û o roportaj de qala xeylê çîyan keno. Cesûr hîsanê xo wina vano: “Wexto ke şehadetî bîyênê û artêşa tirkî destûr nêdayêne ke cenazeyî bêrî girewtene, o wext rik û hêrsê mi hîna zêde bîyênê. O wext her kerraya ke mi eştêne, rayîrê mi dîyar kerdêne. Çimkî dişmen cenazeyanê ma ra tersayêne.”

Gerîla Cesûr wexto ke beşdarê gerîla beno, bi no hawa qala heyacanê xo keno: “Mi hertim embazan dîyêne. Ameyêne Gever û şîyêne. Labelê reya sifteyîne bîye ke ma koyan de raştê yewbînî ameyêne. Heyecan û coşêko cîya estbî. Ez azade bîya û mekananê azadan de bîya. Na partî, partîyêka winasî ya ke tena zûr û beşdarbîyayîşê şaşî qebul nêkena.”

KOYÎ ZEHMETIN Î LABELÊ WEŞ Î

Gerîla Cesûr qala hemratîya PKKyî keno û wina vano: “Mabênê hemratîya komelî û ya PKKyî de ferq esto. Cuya sîstemî de ti eşkenî keso ke ti tira vanî hemra, seba menfîetê xo bikişî, labelê tîya de ti eşkenî seba ci canê xo bidî. Xora xo feda kerdene tewr rehet o. Ti xo bi xo vanî; werekna bêxera canê sewbîna çîyêkê mi bibîyêne, mi bidayêne hemrayê/a xo. Ge-ge seba xelisnayîşê embazêkî 4 embazê bînî şehîd kewenî û no tena tîya de esto. Çîyo ke hemratîya PKKyî yê bînan ra cîya keno zî no yo.”

Cesûr derheqê cuya koyan de zî wina vano: “Ganî merdim vera nê koyan de durist bo. Goreyê mi ganî herkes cuya koyan bivîno û bicuyo. Cuya mi de şansêko gird kewt mi dest. Ez vera xo dana warê Vakurî û şona Botan.”