Merkezê Îrtîbat û Çapemenîya Hêzê Pawitişê Şarî (HPG-BÎM) derheqê çalakîyê gerîlayan û operasyonanê artêşa tirkî de melumatî hîra dayî.

Goreyê melumatê HPGyî netîceyê çalakîyê ke çarçewaya Hemleya Şorişgêrî ya Şehîd Pîroze û Şehîd Agirî de ameyî viraştene de tewr tay 2 leşkerî ameyî kiştene. HPGyî îzehet de vato netîceyê çend çalakîyan zî nêameyo zelal kerdene.

Îzehetê HPGyî wina yo:

“Çarçewaya Hemleya Şorişgêrî ya Şehîd Pîroze û Şehîd Agirî de hêzanê ma 22ê êlule şewe saete 2.00 de taxa Cumhurîyetî ya qezaya Geverî ya Colemêrgî de vera wesayîtêko zirxin de çalakîya sabotajî viraşta. Wesayît de xisarêko gird virazîyayo, labelê hûmara merde û birîndaran nêameya zelal kerdene. Artêşa tirkî çalakîye ra dima gule reşanayî dormeyê xo û kewtiş û vejîyayîşê taxe ame qedexe kerdene.

25ê êlule saete 8.00 de hêzanê ma qezaya Çelê ya Colemêrgî de vera leşkerê ke Girê Xeregolî de ca bîyî de çalakîyêk viraşta. Netîceyê çalakîye de 2 meterîsî ameyî îmha kerdene, labelê hûmara merde û birîndaran nêameya zelal kerdene. Çalakîye ra dima herême bi hewan û obusan ameya bombe kerdene.

26ê êlule de hêzanê ma saete 2.00 de Başûrê Kurdîstanî de vera leşkerê Girê Bayrakli yê herêma Barzanî de ca bîyî de çend çalakîyê suîqestî viraştî. Netîceyê çalakîyan de 2 leşkerî kişîyayî û çalakîyan ra dima artêşa tirkî dormeyî bi hewan û obusan bombe kerdî.

HÊRIŞÊ ARTÊŞA TIRKÎ

24ê êlule de artêşa tirkî mabênê saetanê 23.30 û 2.30î de warê Cîlo, Matê, Oremarî yê qezaya Geverî ya Colemêrgî bombarduman kerdî. Artêşa tirkî bombardumanan ra dima leşkerî ronayî herême û operasyon dayo dest pêkerdene.

Artêşa tirkî 23ê êlule de warê Qela Yunusî yê qezaya Hawêlî ya Sêrtî de bi hetkarîya wesayîtê sîlehinî yê bêmerdimîyan operasyonêk dayo dest pêkerdene. Eynî roje artêşa tirkî bi hetkarîya teknîkî war bombarduman kerdo. Netîceyê bombardumanî de 3 embazê ma şehîd bîyî. Operasyon 24ê êlule de tepîya ancîyayo. Ma do dima ra nasnameyê embazanê xo aşkere bikerî.

ARTÊŞA TIRKÎ NÊŞENA ŞER BIKERA

17ê êlule de artêşa tirkî warê Rojdere yê Dêrsimî de operasyonêk dayo dest pêkerdene. Artêşa tirkî ke nêeşkaya bikewa pêrodayîşî, war bi teyara û helîkopteran bombarduman kerdo. Netîceyê bombardumanî de 4 embazê ma şehîd bîyî. Ma do dima ra nasnameyê embazanê xo aşkere bikerî.