Qedîyayîşê rojeyê Mûharemî ra dima Kurdîstan, Tirkîya û xeylê cayanê bînan de lîyeyê aşûreyî ameyî gîrnayene û loqmeyî ameyî pare kerdene. Bi nê wesîleyî Merkezê Komela Elewîyanê Demokratîke (DAD) zî Dêrsim de loqmeyê aşûreyî vila kerd.

Hemwelatijana piya pîrî, dadîyî, îdarekarê ocaxan, temsîlkarê Komela Elewîyanê Demokratîke yê şûbeyanê Anqara, Mêrsîn, Edene û Stenbolî tewr bîyî.

Pîrê Ocaxê Şih Çobanî Îbrahîm Keteyî û Anaya Ocaxê Derweş Cemalî Menşûre Dogane kirmanckî û tirkî dûayê loqmeyî wendî.

KERBELAYÎ DEWAM KENÎ

Dima zî Hemserekê peroyî yê DADî Mûsa Kûlûyî manaya loqmeyî ser o qisey kerd.

Kûlûyî şewatê Dêrsimî ke bi destê dewlete yeno vetene vist vîr û wina va: “Kerbelayî bi seserran o dewam kenî. Ewro koyê Dêrsimî bi têrûtûrî yenê veşnayene. No Kerbela yo. Ê ke sifreyê Mûavîye de ronişenê wa hol bizanê ke destê Hûseyînî pêsîrê înan de yo.”

Pîr Zeynel Keteyî zî dîyar kerd ke îtîqatî elewîyan rixmê peroyê hêrişan xo paweno û heta ewro ameyo û wina domna: “Ê wayîrê pasaportanê grîyan ke sifreyê nêheqîye de ronişenî, ma na herra bimbareke ra înan ra vanê ke şima do hesab bidî nê îtîqatî.”