Dîcle Xabûre: YNK ganî agêro xeta Mam Celalî
Endama Koordînasyonê KJKyî Dîcle Xabûre hetê YNKyî ra qefilnayîşê ofîsanê Tevgera Azadî rê hêrsê xo ard ziwan û vat ke YNK ganî ca de agêro xeta Mam Celalî.
Endama Koordînasyonê KJKyî Dîcle Xabûre programê "Rojeva Jin" yê Stêrk TVyî de rojdemî ser o qisey kerd.
XOVERDAYÎŞÊ ŞARÎ EŞKENO HER ÇÎYÎ BIBEDILNO
Xabûre grevê vêşanîye yê 2012î vist vîrî û va: ‘‘Tarîxê PKKyî de demanê tewr tengan de şarî bi îradeyê xo rayîr ramot. Nê demî de zî xoverdayîşê şarî eşkeno her çîyî bibedilno. Tecrîdê serê Rayber Apoyî ewro serê heme şaran de yeno bicaardine. Hemverê tecrîdî de grevê vêşanîye ke Leyla Guvene û tepişteyanê PKK û PAJKî dayo destpêkerdene çalakîyêka muhîm a.
Xabûre bale ante faşîzmê Tirkîya ser û va: ‘‘7 ra heta 70 serre her kes yeno tepiştene. Nê hêrişî tersê nînan ramojnenî. Rejimê AKPyî bi operasyonanê qirkerdişê sîyasîyan wazeno ke xebatanê weçînitişî vindarno. Erdogan bi rojdemkerdişê qeyûman mesajê qirkerdişî dano kurdan. Ma ganî rejimê AKP-MHPyî ra vajê ke ‘şima se kenî bikerî, toximê îradeyê azadî ke bedenê ma de ca bîyo, şima nêeşkenî ê çîn bikerî.”
QETILKERDIŞÊ CINÎYAN Û QEYÛM YEWBÎNAN RÊ PABESTE YÎ
Xabûre qetilkerdişê cinîyan û qeyûmî yewbînan rê pabeste name kerdî û wina dewam kerd: ‘‘Qezencê ke cinîyan bi mucadeleyanê girdan fînayî dest çîn kerdî. Cayê cinîyan kerd teng û cinîyî mergî rê terk kerdî. Cinîyan rê cayê xopawitişî nêverdayo. Cinîyî eşkera eşkera ver bi mergî şinî.”
Xabûre ard ziwan ke sebebê tecrîdê serê Rayberê Şarê Kurdî Abdullah Ocalanî ra yew zî tersê ‘cinîya azade’ yo û va: ‘‘Wazenê ke cinîya azade binate ra wedarî. Coka şidet rojanê peyênan de zêdîyo. Ganî ma qirkerdişê cinîyan yê Efrînî, çînkerdişê qezencanê cinîyan, cinîyê sîyasetkarî yê ke tewqîfkerde yî û heme hêrişanê vera cinîyan xo vîra mekerê û keye bi keye, kuçe bi kuçe pêroyê cinîyî yew bî.”
YNK GANÎ CA DE XETAYA XO RA AGÊRO
Xabûre hetê YNKyî ra qefilnayîşê ofîsanê Tevgera Azadî rê hêrsê xo ard ziwan û vat ke YNK ganî ca de agêro xeta Mam Celalî. Xabûre va: ‘‘YNK herinda paştîdayîşê îşxalkaranê xo ganî ca de nê xetayanê xo ra agêro û bi zanayîşê neteweyîye tê bigêro. Şarê Başûrî her roje bombardûmanê artêşa tirkî de qetil beno. Roje roja yewbîyayîş û vera dişmenî de vindertişî ya.‘‘
