28ê Kanûne ya 2011î  de dewa Roboskî ya pabesteya qezaya Qilêbanî ya Şirnexî de bombardûmanê teyareyanê şerî yê dewleta Tirkî de 19ê înan qicî 34 kesî amebî qetilkerdene. Qirkerdişê Roboskî 7 serrî xo ya dima verdayî û heme xebatê huqûqî yê vînayîşê kiştoxan bênetîce mendî. Bi sebebo ke avûkan  evrakê kêmî şawitî Mehkemeya Qanûnê Bingeyênî (AYM) Mehkemeya Heqanê Merdiman a Ewropa (MHME)  qerarê AYMyî yê vera merdimanê Roboskîyijan qebûl kerd.

Ferhat Encu yo ke qirkerdiş de bira û 33 merdimê xo vîndî kerdî serra 7. ya  Roboskî û qerarê MHMEyî ser o ANFyî rê qisey kerd.

KIŞTOXÎ NÊ Ê KE AMEYÎ KIŞTENE  AMEYÎ SUCDARKERDENE

Encuyî vist vîrî ke înan sey keyeyê Roboskî nê 7 serran de her qêde  zext û hêrişî dîyê û va: ‘‘Ma wazenê ke berpirsîyarê sîyasî û eskerî yê nê qirkerdişî bêrî vînayene. Seba mucadeleyê ma yê caardişê edeletî hêrişê ma kenê. Xora nimûneya tewr eşkera ya naye zî dosya ameye şawitene bi mehkemaya eskerî. Ma nê qirkerdişî de zafê qicî 34 merdimê xo vîndî kerdî. Qirkerdiş ra dima  ma Erdoganî ya pîya  xeylî sermîyananê hukmatî de pêdîyayîş viraştî. Rixmo ke ma heme raştîye nînan ra vatî, înan goşnêda ma û nêeşnawitişî ra ameyî. Bi vatişanê ‘‘ Her kurtaj Qilebanêk o‘‘ û ‘‘ma vatene qey ê terorîst ê‘‘ herinda kiştoxan de ê ke ameyî kiştene ameyî sucdarkerdene.''

WAZENÊ KE ROBOSKÎ BIDE VÎRAKERDENE

Encuyî wina dewam kerd: ‘‘Hukmat seba ke Roboskî bide vîrakerdene çike dest ra yeno keno. Wendekarê ke tewrê merasîmê vîrardişê  Qirkerdişê Roboskî bîyî ameyî tewqîfkerdene. Niştox û rojnamegerê ke seba vînayîşê kiştoxan veng danê, binê zextî de yê. Bi zext û hêrişan wazenê ke vengê ma bibernê.''

MA DO ÇIREY AVÛKATAN EF MEKERÊ

Encuyî derheqê qerarê MHMEyî de zî nê vatî: ‘‘Senî ke dewlete berpirsîyarê qirkerdişî ya, berpirsîyarê qerarê MHMEyî zî avûkat ê. Xora AYMî heta ewro dosyayanê sey Roboskî de çirey qeraro raşt nêdayo. La avûkatanê dosyaya  Qirkerdişê Roboskî çi heyfo ke qerarê vera ma sinîya zerrêne de AYMî rê teqdîm kerd. Merdimê Roboskî do çirey Baroya Şirnexî û avûkatanê înan ef mekerê.‘‘

MUCADELEYÊ MA DO DEWAM BIKERO

Encuyî qiseykerdişê xo wina qedîna: ‘‘Ewro ma di hetî ra mucadele kenî.  Hem hetê huqûqî ra hem bi qirkerdişî ma bîyî mexdûr la do mucadeleyê ma dewam bikero. Rixme qerarê MHMEyî û îxmalê avûkatan  edalet korkuçe de bi zî ma do ê bica bîyarê. Ma heme pawitoxanê heqê merdiman û huqûqkaran ra wazenê ke seba dewaya ma wa paştî bidê û ê ke edaletî ra ûmîdê xo nêbirnayo wa ewro goristanê Roboskî de  tewrê vîrardişê serrgêra 7. ya qirkerdişî bibê.''