Erdlerzê Wanî 7 serrî xo dima verdayî la rant dewam keno

Erdlerzê Wanî ke 644 kesî merdîbî 7 serrî xo dima verdayî. Erdlerzî ra dima sektora înşaatî kewtî dewre û şar hîna maxdûr kerd û rant hema dewam keno.

Erdlerzê Wanî ke  erdlerzanê  tewr girdan ê Kurdîstanî ra yew o 7 serrî xo dima verdayî la tesîrî ey hema dewam keno.

644 KESÎ MERDÎ 5 HEZAR KESÎ BIRÎNDAR BÎ

Goreyê humara fermîyî  erdlerzo ke 23ê Teşrîna verêne û 9ê Teşrîna peyêne de virazîyayî de 644 kesî merdî û 5 hezar kesî zî birîndar bîyî. Banê ke rijîyayî nêzdîyê 2.500 bî û konûtanê ke zirar dî zî 40 hezar ra zafêr bî. Tehqîqatê  erdlerzî de  72 hezar 244 banî û cayê gureyî sey rijnaye û giran xesarin ameyî tesbîtkerdene.

ERDOGANΠ BDP Û ŞAREDARÎYA WANÎ  KERDÎ HEDEF

Koordînasyono ke  hetê dewletî ra seba Wanî ame ronayene tede ca nêdîya Şaredarê Wanî Bekîr Kayayî. Erdogan gamêk zî aver şi û va:‘‘ Ê ke xîçan erzenî polîsan cayê afetî de çîn ê‘‘ û BDP û şaredarî hedef ramojnayî.

Erdlerzê Wanî wexto serdin de vîrazîya û no semed ra şertanê keratan ê zimistanî de zehmetîye zî dilab-hîrlab zedya. La şarê Wanî rixmê heme zehmetîye bi yewbîyayîş û paşt yewbîndayîşî xo verda. Welatanê Ewropa mesajê serweşîye vila kerdî û xeylî bi ci da zanayene ke ê seba hetkarî hadre yê. La Serokkomarê ey wextî Abdullah Gulî peşnîyazê  hetkarî red kerd û vat ke hêzê ma, ma rê bes o.

SEBA TOKÎ HERÊMA AFETÎ NÊAMEYE ÎLANKERDENE

Wan û dormeyê ci ke ganî sey cayê afetî îlan bîbîyêne, dewlete dişmenîya kurdan ra bi zanayîş îlan nêkerd, vera BDP û şaredarîya ci şerrêko taybet da û dejê Wanî açarna cayê rantî. TOKÎ cade kewt dewre û bê kontrol banî vîraştî. Nê banî qaşo  newe înşa bîyî la ê zî xesarin bî û şar hîna maxdûr kerd. Erdlerzî ser a 7 serrî ravertî la Wan de çîyek nêbedilya. Şar hîna tengayî anceno û paştgêrî hukmatî zî rantî xo rê dewam kenî.