Rîyê polîtîkayanê hukmatê AKPyî ra Kurdistan û Tirkîya de cuya ekonomîke bîya xirab. No krîz xo tewr zaf zî Kurdistan de ramojneno. Seba ke berdayîş û îmkanê karî tay ê, polîtîkayê şerî yê leyminî zî gama yenê ser tabloyêka xeylî xirabe vejêna werte.

Hewteyanê verênan de Amed de 61 karsazê ke Ceylan-Karavîl AVM de esnafî kenê ardî ziwan ke demanê dikananê înan normalî ra vêşêr ameyê zêdekerdene û reyêk de zemêko vêşî ameyo kerdene. Esnafan vat eke wina şiro ê do mecbûr bimanê ke kepenk bigîrê.

ZUMREYO KE KRÎZÎ RA ÎSTÎFADE KENO

Esnaf Ferhat Mehmetogluyo ke AVM de pastaxane şuxulneno vat krîz hindî nêno nimitene. Mehmeogluyî nê vatî: “Şîrketê pîlî zî hindî konkordato îlan kenê, la halê merdimanê normalan hîna xirab o. Zumreyêk esto ke nê krîzî ra îstîfade keno. Ma sey 61 esnafan qerarê çalakî girewt. Ma selahîyet da 41 embazanê xo ke seba ke îdareyî dir qisey bikerê û demanan zaf nêkerê zêde. Çunke wextê krîzî de vêşîbîyayîşê demanan esnafan fîneeno halêkê zorî.”    

DIKANÎ YENÊ GIREWTENE

Mehmetogluyî bale ante vatişê serekê pêroyî yê AKPyî Tayyîp Erdoganî yo ke vatibi wa nisbetê dolarî 3.75 de bêro sabîtkerdene û qiseykerdişê xo wina domna: “Îdareyê AVMyî zaf qurnaz têgêra. Erdoganî seba ê cayanê ke nisbetê dolarî 3.75 ra vêşêr kerdibi wina vatibi la înan no xo rê sey firsend dî û cayê ke demanê înan binê 3.75 de yê rê zî zem kerd.

Înan demanê ma zî 2.75 ra vet 3.75. Heta Çile do 7 fîrmayî tîya berê xo bigîrê. Hukmat bêveng maneno. Eke wina şiro do hewna zaf fîrmayî konkordato îlan bikero. Mesela ez bê ke konkordato îlan bikerî ez do bigîrî.”  

'KARÊ MA ÇENDE ŞINÊ BENÊ XIRAB'

Karsazê pakkerdişê zuwayî Resul Tosunî zî vat: “Seba ke karê ma tekstîl o ma hîna zaf krîzê ekonomîkî ra bitesîr bî. Ma mecbûr mendî ke êyê ke verê ma de xebitîyayêne kar ra berzê. Nika ez domananê xo dir dewam kena. Ganî ma îdareyê AVMyî dir nê meseleyî hal bikerê. Eksê nê halî de ma do mecbûr biamnê ke dikananê xo bigîrê.”