Esnafê halî wazenê ke Tirkîya de bingehê polîtîkaya zîreetî newe ra bêro eştene. Reyna esnafî vanê zamî her roje hîna benê zêde û faturaye zî înan rê yena birnayene. Esnafanê halî, derheqê Pêşnameyê Qanunî yê Halî de qisey kerd û va bi nê pêşnameyî do marketê pîlî yê mîyanneteweyîyî qezenc bikerê û esnaf îflas bikero.
MA BÎYÊ ŞERPEZE, WA BÊRÊ MABÊNÊ ŞARÎ, MECLÎS DE BI QISEYKERDIŞÎ NÊBENO
Adem Îned 30 serrî yo ke esnafîye keno. Îned vano eke Pêşnameyê Qanunî yê Halî meclîs ra derbaz bibo, hem seba xerckerdoxan hem zî seba berardoxan do rewşêka girane bivejîyo meydan.
Goreyê Înedî eke komîsyonkarî ke bêrê wedaritene, o wext bi hezaran kesî do bêgure bimanê. Înedîyî wina qisey kerd: “Hende xebatkarî do kamca de bixebetîyê û nanê xo kamca ra bivejê? Wa bêrê rezîlîya ma bivînê. Meclîs de bi qiseykerdiş nêbeno. Bêrê bikewê mabenê şarî û rewşa esnafan bivînê.“
WA BÊRÊ Ê BI XO HESAB BIKERÊ
Înedîyî derheqê vaybîyayîşê meywe û sewzeyan de va eleqeya înan pê çin a û wina dewam kerd: “Mazotî hevsarê xo visnayo û şono. Serê yew kîloyî 250 lîra şono naqlîye rê. Wa ê bi xo bêrê hesab bikerê.“
Sefer Kamber zî 40 serrî yo ke esnafîye keno. Kamber zî wina vano; “Ez 40 serrî yo ke esnafîye kena. Wezaret wexto ke yew karî keno, ganî her çiyî hesab bikero û wina game bierzo. Tîya federasyonê ma yê sewzerotoxan esto, Ganî fikrê federasyonî zî bipersê. Qanûnî goreyê naye bivejê. Bi mi kerd û bî nêbeno.“
VATIŞÊ ‘BI ERJANÎYE GÊNÊ Û BI VAY ROŞENÊ‘ ŞAŞ O
Kamber vano derheqê komîsyonkaran de fikrêko şaş esto û na şaşîye ganî bêro rastkerdene. Vanê komîsyonkarî erjan gênê û bi vay roşenê. Vanê komîsyonkarî bi yew lîra gênê û bi panc lîrayan roşenê. O wext ma ustinê dikananê xo kerdêne zern. La merdim ke ewnîyeno halê esnafê halî rezîl o. Nê qanûnî ra çîyêk nêvejîno. Ganî baş bêro analîzkerdene û rewşa esnafî baş bêro fehmkerdene.“