Fermandar Garzan: Herekol dişmenî rê do tim bibo goristan

Fermandar Egîd Garzanî hêrişanê vera Herekolî ser o qisey kerd. Garzanî ard ziwan ke dişmenî çend qilî tepiştî û ûca de mehsur mend û va: ‘‘Herekol do tim dişmenî rê bibo goristan.‘‘

Vera hêrişê dewleta tirkî ke her roje Kurdîstan de zêdyeno xoverdayîşê gerîlayan dewam keno. Fermandarê Herekolî  Egîd Garzanî hêrişê dewleta tirkî ê vera Herekolî ser o qisey kerd.

Garzanî da zanayene ke dewleta tirkî vera xoverdayîşê gerîlayî de tengayî ancena û wina dewam kerd: ‘‘Bitaybetî zî psîkolîjîya  leşkeran zaf xirab a. Leşkerî tarîyê şewe de kerra zî bivînî tersê gerîlayan ra bi seyan guleyî nanî pa. Dişmen propaganda keno û vano ke ‘ma kewtî tîya, ma tîya girewt‘ la cayê ke vanî ûca de operasyon çîn o. Dewleta tirkî sey timî şerro taybet dana domnayene. 25ê Temmuze de dişmenî dormeyê Çemê Karê de operasyonêk da destpêkerdene. Heman roje de embazan vera înan çalakîyek viraşte û 3 leşkerî ameyî kiştene.‘‘

LEŞKERÎ SÎNOR DE TENGAYÎ ANCENÎ

Garzanî ard ziwan ke 26ê Temmuze de hêrişê vera Herekolî hîna ame hîrakerdene û wina dewam kerd: ‘‘Dişmenî herêma Kulid, Şehîd Sorxwîn û Şehîd Canxortî girewte binê kontrolî. Dişmen vano ke ‘ma kewtî her cayê Herekolî‘ na zûr a. No şerro taybet o. Sey timî wazenî ke şarî bixapînî. La ê se kenê wa bikerî nêeşkenî raştîyan binimnî. Leşkeran hema destpêkerdişê operasyonî de derbeyê girdî werdî. Çalakîyan de nêzdîyê 40 leşkerî ameyî kiştene. Dişmen  merdeyanê xo nêvano û derbeyo ke Herekol de werdo nimineno. Leşkeran paştê xo teknîkî ra gire dayo la ey rixmê naye nêeşkenî vera gerîlayî şerr bikerî. Leşkerî sînor de tengayî ancenî. Qilê ke tepiştî nêeşkenî ci ra vejî.‘‘

DIŞMEN KOYANÊ KURDÎSTANÎ DE NÊEŞKENO REHET BICUYO

Garzanî vist vîrî ke ê 35 serrî yo mucadeleyê çekinî danê domnayene û va: ‘‘Dişmen nêeşkeno bikewo Herekolî. Tena yew- di qilê girewtî û ûca de mehsur mendî. Hem arazîya Herekolî ra hem zî çalakîyanê gerîlayî ra ê nêeşkenî bikewî Herekolî. Embazan Qilê Şehîd Berxwedanî de çalakîyek viraşte û dişmenî cade o qil ca verda, rema. Çalakîyanê gerîlayî ver koyanê Kurdîstanî de dişmenî rê rehetîye çîn a.

DEWLETA TIRKÎ ŞARÎ RA RAŞTÎYAN NIMNENA

Fermandar Egîd Garzanî  qiseykerdişê xo bi nê vatişan qedîna: ‘‘Goreyê medyaya tirkî  dişmenî Herekol û xeylî cayê Kurdîstanî girewtî.  Goreyê zûranê înan gerîla zî zaf tengayî anceno. La gerîla vera na propagandaya zûre bi çalakîyan cewab dano. Nika heme koyanê Kurdîstanî de gerîla derbeyanê girdan dano dişmenî ro. Bi operasyonê Herekolî dişmenî reyna dî ke ê nêeşkenî koyanê Kurdîstanî kontrol bikerî. Herekol nê operasyonî de zî înan rê bi goristan. Vera hêrişê dişmenî gerîlayê azadîye do tim mucadele bikerî û Herekol tim dişmenî rê bibo goristan.‘‘