Merkezê Çapemenî û Îrtîbatî yê HPGyî detayê çalakîyanê ke hemverê leşkeranê ke Gabar de vejîyabî operasyon ameybî viraştene pare kerdî.

HPGyî eşkerayîye de vat: “Roja 9ê Teşrîna peyêne artêşa tirkî ya îşxalkare wareyê Gelîyê Gordila yê herêma Gabarî ya Şirnexî de operasyonêko hîra da destpêkerdene. Hêzanê ma heman roje de saet 15.00 de çarçiwaya Hemleya Şorişgêre ya Şehîd Delal Amede û Şehîdanê Besta de hemverê artêşa tirkî ya îşxalkare ya ke waştêne xo Qilê Şehîd Rêzanî de bica bikero çalakîyêk viraşte. Hêzê dişmenî mesafeyêkê nizdî ra bi hawayêkê bitesîrî ame pawanayene, 2 leşkerê dişmenî ameyî kiştene, xeylî leşkerî zî birîndar bîyî.”  

MECBÛR MENDÎ KE XO PEY DE BIANCÊ

Hêzanê ma ancî çarçiwaya hemleya şorişgêre de roja 11ê Teşrîna peyêne saet 11.45 de hemverê artêşa tirkî ya îşxalkare ke xo Qilê Şehîd Soro de bica kerdebî çalakîyêk viraşte. Çalakîye de yewîya dişmenî gîrîya binê gulevaranêkê giranî, netîce de 5 leşkerî ameyî kiştene û xeylî leşkerî zî birîndar bîyî. Çalakîye ra dima artêşa tirkî ya îşxalkare wareyê çalakîye bi helîkopteranê hêrişî raşte raşt bombardûman kerd û merde û birîndarê xo bi helîkopteranê Skorskyî wareyî ra wedartî.

Netîceyanê çalakîyan de artêşa tirkî ya ke xeylî vîndîbîyayeyê ci virazîyayî mecbûr mende ke roja 12ê Teşrîna peyêne saet 13.30 de xo wareyanê operasyonî ra destveng pey de bianco.

TEYAREYAN QENDÎL Û HEFTANÎN BOMBARDÛMAN KERDÎ

HPGyî da zanayene ke teyareyanê şerrî yê artêşa tirkî roja 11ê Teşrîna peyêne dorê saeta 20.00 de wareyê Pîrbula yê pabesteyê herêma Heftanînî ya Wareyê Pawitişî yê Medya bombardûman kerd.

HPGyî vat ke ewro saetanê mabênê 09.00 û 09.40 de teyareyanê artêşa tirkî wareyê Dola Bedrana yê herêma Qendîlî zî bombardûman kerd, da zanayene ke nê bombardûmanî de tu vîndîbayeyêkê înan nêvirazîyayo.