'Ganî ma xoverdayîşê vera tecrîdî pêt bikîme'

Parlamennterê HDP‘yî Hezere û Aydogane beşdarê rayîrşîyayîşê dergî yê Basel-Strasbourgî bîyî û parlementeran, seba wedaritişê tecrîd û beşdarbîyayîşê rayîrşîyayîşî vengdayîş kerd.

Seba şermezarkerdişê komploya mîyanneteweyî ya vera Rayberê Şarê Kurdî Abdullah Ocalanî û seba ke paştdarîye bidê xoverdayîşê grevanê vêşanîye, Kurdan ê Ewropa Basel ra heta Strasbourg rayîrşîyayîşêko derg organîze kerd. Parlamenterê HDP yê verênî Tugba Hezere û Nursel Aydogane zî beşdarê rayîrşîyayîşî bîyî û no derheq de beyanat da ANF’yî.

MA KE TECRÎDÎ WEDARNÎME KOMPLO ZÎ DO BIBO BINKEWTE

Parlamentera HDP‘yî ya verêne Tugba Hezere wina qisey kerd: “Nika xeylî cayan de xoverdayîşî estê. No rayîrşîyayîşo ke merkezê Ewropa de beno, dolimêna musneno ke komploya mîyanwelatîye nêreşta hedefê xo. Ma bi rayîrşîyayîşê emserî hetê ra wazenîme tecrîdê serê Birêz Ocalanî bêro wedaritene, hetê bînî ra zî kenîme ke paştdarîye bidîme embazanê xo yê grevê vêşanîye.Çiyo ke bi komplo nêardo sere kenê ke bi tecrîdî bikerê. La vera tecrîdî xoverdayîşêko pêt esto û roj bi roje beno vila. Bedenê embazanê ma yê grevê vêşanîye her roj hîna zêde helînê. Ma nêwazenîme seba ke tecrîd bêro wedaritene embazê ma bimirê. Ma bi xoverdayîşêkê pêtî eşkenîme xoverdayîşê embazanê xo hîna aver berîme û tecrîdî bişiknîme. Naye ra zî kamca de beno wa bibo, ganî ma wirzîme payan ser û xover bidîme. Ma ke tecrîdî bişiknîme, o wext ma do peynîya komploye zî bîyarê. No destê ma de yo. Rewşa embazanê ma yê grevê vêşanîye başe nîya, wextê xoverdayîşî yo.“

AYDOGANE: MA RAYÎRŞÎYAYÎŞÎ BI BAWERÎYA AZADÎYE KENÎME

Parlamentera HDP‘yî ya Amedî ya verêne Nursel Aydogane zî bale ante muhîmîya Ocalanî ser û wina va: “Bi seyan merdimî, nê hewayê serdî de ameyê têhet û kewtê rayîrşîyayîş. No seba azadîya Ocalanî yeno kerdene, bi na hêvîye no rayîrşîyayîş yeno kerdene. Hem ma rayîrşîyayîşwanî, hem Kurdîstanî û hem zî şarê rojakewtena mîyanêne baş zanê ke seba demokrasî û çareserîya problemê Kurdan Birêz Ocalan wayîrê rolêkê muhîmî yo û îhtîyacîye bi ey esta. Seba wedaritişê tecrîdî nika teber de xoverdayîş esto. Ma baş zanîme ke heta Ocalan azad nêbo, ne Tirkîya bena demokratîk, ne zî problemê Kurdan çareser beno. Naye ra zî heta ke Birêz Ocalan bibo azad, çalakî û xoverdayîşê ma do dewam bikerê.“

TECRÎD DO BI XOVERDAYÎŞÎ BÊRO ŞIKITENE

Aydogane peynîya qiseykerdişê xo de wina va: “Ma bi na çalakîye wazenîme ke xoverdayîşê embaza xo Leyla Guvene û embazanê xo yê bînan zî bidîme heşnayene û xoverdayîşê înan hîna pêt bikîme. Wa her kes bizano ke embazê ma yê grevê vêşanîye seba ma xover danê. Ganî ma ci rê wayîrtîye bikîme û xoverdayîşê înan ver bêveng mevindîme.“